Xefe Estadu simu karta kredensiál husi Embaixadór Angola
DILI, 23 maiu 2024 (TATOLI)-Prezidente Repúblika, José Ramos Horta, simu kredensiál diplomátiku husi José Andrade de Lemos nu’udar Embaixadór foun Estraordináriu no Plenipotensiáriu Repúblika Angola nian ba Timor-Leste iha Palásiu Prezidensiál Bairru-Pité Dili, kinta ne’e.
“Embaixadór José Andrade de Lemos nu’udar diplomata Angolanu ida ne’ebé susesu iha karreira ne’ebé hala’o durante tinan tolu-nolu nia laran,” tenik iha nota ne’ebé Agência TATOLI asesu husi mesia Palásiu Prezidensiál.
Timor-Leste no Angola iha ligasaun istórika ida-ne’ebé kle’an iha sira-nia luta ba libertasaun nasionál.
Nasaun rua ne’e iha kompromisu atu hametin sira-nia relasaun bilaterál amigável iha ámbitu Komunidade País Lian Portugés (CPLP- sigla portugués).
Timor-Leste rekoñese potensialidade Angola nian iha setór mina-rai no gás, hodi hatudu interese iha parseria diplomátika, ho Angola sei sai hanesan nasaun primeiru husi nasaun Afrika ne’ebé ko’alia lian portugés hodi loke embaixada iha Timor-Leste, hodi kontinua relasaun diplomátika.
Kooperasaun entre nasaun rua ne’e mós haluan ba asuntu rejionál sira, inklui disputa marítima iha Tasi Xina Súl, iha ne’ebé Timor-Leste apoiu rezolusaun pasífika liuhosi diplomasia.
Nasaun rua apoiu malu iha esforsu multilaterál sira inklui esforsu Timor-Leste nia integrasaun ba ASEAN no pozisaun Angola nian iha Sahara Osidentál.
Prezidente Ramos-Horta hato’o nia konfiansa katak Embaixadór José Andrade de Lemos sei hasa’e no hametin ligasaun amizade no kooperasaun entre Timor-Leste no Angola.
Embaxadór José antes ne’e, servisu nu’udar konselleiru iha Gabinete Sekretáriu Estadu Negósius Estranjeiru (SENE) no Embaixadór Angola nian ba Emiradus Arabes Unidus, Arabia Saudita, Kuwait, Qatar no Bahrain.
Jornalista: Hortencio Sanchez
Editór: Florencio Miranda Ximenes
