SAÚDE

Antigu ministru asuntu kombatente libertasaun nasionál “Meta Mali” hakotu iis iha HNGV

Antigu ministru asuntu kombatente libertasaun nasionál “Meta Mali” hakotu iis iha HNGV

Antigu Ministru Asuntu Kombatente Libertasaun Nasionál (MAKLN), Júlio Sarmento da Costa “Meta Mali”. Imajen Tatoli/Egas Cristóvão.

DILI, 24 Maiu 2024 (TATOLI) –Antigu Ministru Asuntu Kombatente Libertasaun Nasionál, Júlio Sarmento da Costa “Meta Mali”, idade 65, sesta (24 maiu 2024) ne’e, hakotu iis iha Hospital Nasionál Guido Valadares (HNGV), iha tuku 07h55 dadersaan.

Xefe Departamentu Servisu Emerjénsia iha HNGV, Eldegar Lopes Martins, hateten pasiente tfamília sira lori ama iha sala emerjénsia iha dadeersan, no doutor sira halo esforsu maibé la konsege salva pasiente nia vida.

“Pasiente mai iha emerjensia purvolta iha tuku 06h55, lakon konsiénsia no nia doutór sira iha emerjénsia koko halo EKG ka halo ezame ba koko rítimu fuan nian ho atakasaun fuan másivu, nune’e nia fuan para kedas. Dotór sira koko halo resuscitasaun maibe laresponde, nune’e to’o tuku 07h54 minutu, doutór sira deklara mate tanba atakasaun fuan,” Xefe Departamentu Servisu Emerjénsia iha HNGV, Eldegar Lopes Martins, hateten ba Agência Tatoli, liuhusi WhatsApp.

Antigu Ministru Asuntu Kombatente Libertasaun Nasionál (MAKLN), Júlio Sarmento da Costa “Meta Mali”. Imajen Tatoli/Egas Cristóvão.

Matbian nia alin, Horacio da Costa Sarmento, hateten matebian senti moras iha dadeersan tuku neen iha uma, entaun nia espoza haruka oan sira lori lalais ba HNGV iha sala emerjénsia, maibé maibé lakonsege salva.

“Sira telefone ha’u ba emerjénsia besik tuku hitu tama emerjensia. Kolega doutor sira iha emerjénsia halo hela atendimentu, sira informa dehan nia kurasaun mak intupidu ka blokeia. Kolega sira halo buat hotu, maibé labele salva,” matebian nia alin, Horacio da Costa Sarmento, hateten ba jornalista sira iha matebian nia rezidénsia iha Marconi.

Nia hateten, matebian iha sofre moras komplikasaun hanesan infesaun estomuk no pulmaun.

Durante ne’e, matebian mós halo tratamentu iha tinan rua liuba iha Malázia hodi tau kadeli iha fuan tanba moras kardiovaskulár.

Husu kona-ba prosesu fúnebre, nia hatán, familia hosi matebian sei tur hamutuk hodi ko’alia no deside kona-ba serimónia fúnebre ne’e.

Saudozu Júlio Sarmento da Costa moris iha postu administrativu Maubisse, munisípiu Ainaro, iha loron 20 Jullu 1959 no daudaun ne’e husik hela nia espoza ho nia oan na’in-lima (5) ne’ebé kompostu husi feto na’in-rua (2) no mane hamutuk na’in-tolu (3).

Durante moris, husi fulan-agostu tinan 2012 to’o fulan-fevereiru tinan 2015, matebian asume karreira profisionál iha polítika ne’ebé pertense ba iha Partidu Demokrátika (PD) ne’ebé asume kargu iha estrutura Governu liuliu iha Governu Konstitusionál da-neen (VI) assume kargu hanesan Sekretáriu Estadu Asuntu Konbatente Libertasaun Nasionál.

Iha tinan 2017 to’o tinan 2018, saudozu Júlio Sarmento da Costa “Meta Mali” asume kna’ar hanesan membru Parlamentu Nasionál.

Iha Governu Konstitusionál da-ualu (VIII) ne’ebé lideradu husi Primeiru-Ministru, Taur Matan Ruak, veteranu Júlio Sarmento da Costa “Meta Mali” hetan konfiansa hodi asume kargu hanesan Ministru Assuntu Kombatente Libertasaun Nasionál (MAKLN) iha períodu 2020 to’o 2023.

Jornalista : Jesuína Xavier

Editór        : Cancio Ximenes

iklan
iklan

Leave a Reply

iklan
error: Content is protected !!