DILI, 24 maiu 2024 (TATOLI) – Banku Mundiál fó apoiu ba Governu Timor-Leste liuhosi Ministériu Finansas no Banku Sentrál Timor-Leste (BCTL, sigla portués) kona-ba implementasaun sistema auditoria no padraun kontabilidade iha Timor-Leste (TL), hodi fasilita setór públiku iha dezenvolvimentu ekonómiku.
“Padraun audiénsia no kontabilidade importante tebes atu suporta rendimentu ekonómiku ba setór privadu, liuliu atu hetan lukru. Atu nune’e sistema ida-ne’e bele ajuda emprezáriu no emprezária sira atu hala’o sira-nia negósiu sira”Reprezentante Banku Mundiál iha TL, Bernard Habone, dehan ba jornalista sira hafoin workshop iha Novo Turismu, sesta ne’e.
Nia hatutan, atividade ohin, hanesan faze dahuluk atu halo revizaun no Banku Mundál sei apoia Ministériu Finansas no BCTL hodi kria lei ida kona-ba sistema kontabilidade iha Timor-Leste.
“Ami hein katak to’o tinan-ne’e nia rohan, buat hotu ita sei implementa ona”, nia afirma.
Iha fatin hanesan, Vise-Ministra Ministériu Finansas, Felicia Claudinanda Cruz, mós deklara katak liuhosi apoiu hosi Banku Mundiál no DFAT, Governu TL bele fasilita finansa publika.
“Ministériu Finansa mós planeia ona atu implementa iha tinan oin, tanba Ministériu Finansas haree hela finansa públika, tanba avaliasaun ohin nian mak kona-ba kapasitasaun”, Vise-Ministra relata.
Governadór BCTL, Helder Lopes, mós dehan sistema kontabilidade ne’e importante tebes atu fasilita dezenvolvimentu ekonómiku Timor-Leste nian liuhosi setór privadu.
“Liuhusi apoiu husi Banku Mundiál atu implementa sistema kontabilidade iha ita-nia nasaun, atu setór privadu, setór finanseiru ka banku sira, instituisaun finanseiru sira, ita hotu bele hetan benefísiu husi ita-nia kontabilidade iha setór públiku atu nune’e bele suporta dezenvolvimentu ekonómiku”, Helder revela.
Nia informa, benefísiu ida husi sistema kontabilidade mak bele promove transparénsia atividade ekonómika sira, ne’ebé relasiona ho setór públiku, ezemplu, se empreza ida hakarak selu impostu no empreza ne’e rejista ona ho padraun kontabilidade, atu nune’e dadus hothotu kona-ba rendimentu no despeza sira bele disponivel, entaun bele selu impostu automatikamente ho transparénsia.
“Sistema kontabilidade bele fasilita forma atividade ekonómika sira, dezenvolvimentu setór privadu sei dezenvolve. Setór finanseiru sei konfortavel liu hodi fó kréditu ba setór privadu no setór públiku sei promove transparénsia ho di’ak”, nia konklui.
Workshop ne’e, partisipa husi Setór Privadu iha Timor-Leste, Indonézia, Aid, DFAT no seluk tan.
Jornalista : Felicidade Ximenes
Editór : Zezito Silva
