NASIONÁL, HEADLINE

DNIK fasilita ona infraestrutura rede internet ba instituisaun Estadu 559

DNIK fasilita ona infraestrutura rede internet ba instituisaun Estadu 559

Diretór Nasionál Infraestrutura no Komunikasaun, Ambrosio M. B. Amaral. Imajen/Tatoli

DILI, 24 maiu 2024 (TATOLI)—Diresaun Nasionál Infraestrutura no Komunikasaun (DNIK) iha Ministériu Transporte no Komunikasaun (MTK) liuhusi Projetu Nasionál Konetividade (PNK) fasilita ona infraestrutura rede internet ba instutisaun Estadu hamutuk 559 iha territóriu laran.

Diretór Nasionál Infraestrutura no Komunikasaun, Ambrosio M. B. Amaral, hateten, diresaun ne’e nia serbisu mak prepara no dezenvolve infraestrutura rede governamentál sira husi internet hodi kolabora ho entidade sira hotu no garante sistema Tekonolójia Informátiku no Komunikasaun (TIK) Governu nian husi nível nasionál to’o lokál.

“DNIK fasilita ona rede internet ba instituisaun Estadu 559 iha territóriu laran ho infraestrutura kabu fibra ótika utiliza torre liña Eletrisidade Timor-Leste, signifika agora sistema dijitalizasaun husi Governu, ida-ne’e hatudu ita-nia infraestrutura funsiona ona espesialmente iha sentru munisípiu sira,” Ambrosio Amaral, informa ba Agência Tatoli, via telefónika, foin lalais ne’e.

Nia dehan, Governu rasik iha instituisaun hanesan TIC Timor, I.P ne’ebé nia objetivu kria sistema dijitál no Governu eletróniku maibé bainhira la apoiu ho infraestrutura ne’ebé apropriadu maka laiha valór.

“Desde tinan-2002, ita-nia kapasidade liña internet iha de’it 512kbps, daudaun kapasidade to’o ona  1Gb ka 1000mbps, ne’ebé distribui ba instituisaun Governu nian. Ita espera projetu kabu fibra ótika ho kapasidade liña internet bele aumenta sa’e ba 800Gb iha faze dahuluk to’o 27Tb,” nia tenik.

Notísia relevante : MTK orienta ANC koordena ho operadór telekomunikasaun hadi’ak rede ínternet

PNK I hahú husi 2008, PNK II iha 2011, PNK III iha 2023, PNK IV iha 2014, PNK V 2015, PNK VI iha 2016, no PNK VII iha 2022, daudaun Governu liuhusi DNIK halo hela prepasaun ba implentasaun PNK ba VIII nian.

“Ba PNK VIII nian ne’e ita sei fasilita konetividade internet ba instituisaun Estadu ne’ebé seidauk iha, no sei liga mós ba sentru saúde no sede suku sira hodi garante programa sistema dijitalizasaun husi Governu,” Diretór ne’e esplika.

Konetividade internet iha rai-laran uza de’it sistema microwave husi operadór telekomunikasaun sira hanesan Timor Telecom ho kapasidade hamutuk 4Gb, Telemor 7,5Gb, Telkomcel 13,5Gb nune’e, Internet Service Provider (ISP) hanesan Metro Link no SACOM TL sira ne’e hotu tau hamutuk 30Gb de’it.

Kona-ba konetividade liña internet ne’ebé dala barak monu ne’e, tanba sistema microwave rasik iha limitasaun distánsia liña hasoru klima, liu-liu tempu udan.

Maski nune’e, daudaun ne’e operadór Telemor mak sai superior kobertura ba konetividade tanba iha instala ona kuaze 300 tower Base Transceiver Station (BTS) iha territóriu-laran.

Folin internet iha Timor-Leste rasik sei karun no rendimentu operadór telekomunikasaun sira tun kompara konstrusaun tower BTS ida ho valór $50.000 to’o $100.000 inklui selu taxa ba Autoridade Nasionál Komunikasaun (ANC, sigla portugés) to’o $1.000 kada tinan ba tower BTS ida.

“Aleinde ne’e, la fásil hili hili fatin hodi harii tower BTS,” nia dehan.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!