EDUKASAUN, COVALIMA, HEADLINE

Edukasaun Covalima koloka profesór 11 ba EBC no EBF

Edukasaun Covalima koloka profesór 11 ba EBC no EBF

Profesór no funsionáriu públiku iha Covalima tuir formasaun kona-ba utilizasaun dalen Tetun liuhosi atividade hakerek. Imajen Tatoli/Celestina Teles.

COVALIMA, 24  Maiu ( TATOLI)Servisu Munisipál Edukasaun  Covalima , kuarta ne’e , koloka ona  profesór hamutuk ema 11 bá iha eskola Ensinu Báziku Centrál  (EBC) no Eskola Bázika Filiál (EBF) hamutuk 11 iha munisípiu Covalima.

Diretora Servisu Edukasaun Covalima,  Elda de Fátima relata Ministériu Edukasaun koloka profesór ba munisípiu Covalima hamutuk 13, nune’e na’in 11 koloka ona ba EBC no EBF, enkuantu na’in rua seluk seidauk desloka ba Covalima ho razaun maka problema transporte.

“Ami koloka profesór ba eskola bázika  filiál  primeiru to’o sesta ano hanorin  ba disiplina jerál no ba eskola bázika sentrál ba disiplina matemátika,  lian inglés, portugés,” nia hateten ba jornalista TATOLI, iha salaun Autoridade Munisípiu Covalima, sesta ne’e.

Hosi númeru profesór destakadu na’in 11 ne’e,  destaka bá iha Eskola Bázika Filiál (EBF) Hare-Kain, Soiliga, Mape, Nalaop, Matai no EBF Pelet, Eskola Bázika Sentrál (EBC) Salele, Ogues, Gala no Zumalai. Tuir dadus hosi Servisu Munisipál Edukasaun  Covalima rejista eskola bázika sentrál  (EBC) públiku hamutuk 20 ho eskola bázika  filiál 74.

Diretór EBC Ogues, Saturnino Barros, hateten ho prezensa profesór destakadu sira bele rezolve ona problema menus professór ne’ebé maka durante ne’e sai kestaun importante atu hanorin alunu sira.

“Servisu Edukasaun Covalima konvida ami hodi simu profesór foun ne’ebé foin lalais pasa iha prosesu rekrutamentu ami hetan kolokasaun profesór na’in-ida ba disiplina siénsia fizika durante ne’e trimestre ida ami labele hanorin disiplina refere tanba laiha profesór,” nia hateten.

Maski Ministériu Edukasaun destaka ona profesór na’in ida bá iha eskola ne’ebá maibé, nia relata eskola ne’e sei kontinua menus profesór iha siénsia fizíka hodi hanori estudante sira.

Jornalista: Celestina Teles

Editór:Agapito dos Santos

iklan
iklan

Leave a Reply

iklan
error: Content is protected !!