iklan

HEADLINE, SEGURANSA

Ekipa asegura tán suspeitu na’in-lima hadau telefone

Ekipa asegura tán suspeitu na’in-lima hadau telefone

Suspeitu ne'ebé envolve krime Furtu Agravadu. Foto Natalino Costa.

DILI, 24 maiu 2024 (TATOLI) – Ekipa konjunta ne’ebé kompostu hosi Departamentu Investigasaun Kriminál Nasionál (DIK, Departamentu Informasaun Polísia (DIP), Unidade FALITIL, Servisu Intelijénsia (SNI), N2, S2 Makikit no Araña detein tán suspeitu na’in-lima ne’ebé envolve iha kazu furtu agravadu.

Ekipa konjunta detein suspeitu sira ne’e iha área diferente iha Dili no hirak ne’e PNTL detein ona iha sela Komandu PNTL Dili.

Xefe DIK, Inspetór Inspetór Mouzinho Correia, konta kazu furtu agravadu ne’ebé akontese iha tersa (21/5), iha Prai dos Cuqueiros Dili ne’ebé rezulta sidadaun feto ida ho nia oan kondús motorizada hosi diresaun Kampung Alor derepente suspeitu na’in-haat ho motorizada rua hadau sidadaun feto ne’e nia telefone to’o feto ne’e duni tuir hosi Kampung Alor mai hetan asidente.

Nia dehan, hosi kazu ne’e rezulta vítima nain rua mak hetan asidente grave, oan no  inan, momentu ne’e ema na’in rua ne’e dezloka kedan ba Ospitál Nasionál hodi hetan tratamentu, maibé iha kinta (23/5) horseik sidadau feto ne’e nia oan Nituchia Fangidae mate, no nia inan kontinua baixa.

“Hosi kazu ne’e ita-nia autoridade intelijénsia ho PNTL buka tuir kedan suspeitu, entaun horseik ita konasge lokaliza no identifika ema na’in-hitu ne’ebé envolve iha asaun hadau telefone ne’e”, dehan nia.

Suspeitu sira mak RML(19), VCB (17), PPDI (19), YGCS(19), JSP (17), HC (17)  RBC (17) no JEBP (16)

“Sira ne’e ekipa konjunta ka’er iha fatin diferente iha Díli laran. Hosi Suspeitu sira ne’ebé ita ka’er ne’e autór prinsipál ne’ebé hadau sidadaun feto ho nia oan to’o hetan asidente ne’e iha na’in haat mak JEBP, RBC RML no BCB, sira ne’e mak ho motór rua hodi hadau vítima nia telefone foin daudaun ne’e”, Inspetór Mouzinho Correia, hateten ba jornalista sira iha Komandu Jerál PNTL Caicoli, sesta ne’e.

Enkuantu, suspeitu na’in-tolu seluk ne’e nu’udar grupu hosi suspeitu na’in-haat ne’e nian.

“Ita bo’ot sira hatene suspeitu nain tolu seluk, ne’e ida mak durante ne’e mós envolve iha kazu hadau telefone iha kapitál Dili ne’ebé foin daudaun hadau alin feto ida-nia telefone, nune’e vítima duni tuir ka’er tiha suspeitu ida no suspeitu ida seluk halai ne’e mak ita mós ka’er hotu ona”, nia adianta.

Inspetór hateten, suspeitu sira mak halo operasaun hadau telefone ema hosi motór leten no naok ema-nia motór inklui naok komunidade nia animál sira iha Dili laran.

“Suspeitu sira ne’e, iha grupu lubun bo’ot iha kapitál Dili tanba ne’e ita konsidera sira ne’e  hanesan grupu organizadu. Maibé ba ida-ne’e polísia latolera no sei kontinua buka tuir to’o kaer hotu suspeitu sira ne’e. Ami mós sei buka tuir agora, ami-nia ekipa informasaun buka tuir hela ida-ne’e, sé mak iha kotuk ami sei buka tuir hodi halo identifikasaun ba nia”, nia afirma.

Komandante ne’e hateten, PNTL asesura motorizada ho tipu Beat hamutuk haat ho xapa matríkulaV 94.07, T 66.36, V 35.32 no T 91.86.

Notísia relevante : PNTL asegura suspeitu na’in-rua hadau telefone ne’ebé rezulta Nituchia Fangidae lakon vida

Jornalista: Natalino Costa  

Editór : Zezito Silva

 

 

iklan
iklan

Leave a Reply

iklan
error: Content is protected !!