DILI, 24 maiu 2024 (TATOLI)– Ekipa istimadu FC Iraler susesu manán nia adversariu Maubale FC ho rezultadu 3-2 iha jogu kontinuasaun kopa Federasaun Futeból Timor-Leste (FFTL) ne’ebé realiza iha Estádiu Munisipál Dili, sesta loraik ne’e.
Husi rezultadu ne’ebé Iraler hetan lori ekipa ne’e okupa kedan iha pozisaun prumeiru tabela klasifikasaun provijoriu grupu C ho pontu tolu, iha pozisaun segundu FIEL FC ho pontu ida, terseiru Zhavia FC ho pontu ida no ikus liu Maubale FC ho lontu zero.
Maske hetan ona pontu tolu, maibé Iraler sei haka’as aan maka’as iha jogu tuir mai kontra FIEL FC no Zhavia FC bainhira manán mak ekipa ne’e sei ultrapasa ba faze meiu finál. Enkuantu Maubale sei iha oportunidade jogu rua kontra FIEL no Zhavia.
Golu vitória Iraler prodús husi jogadór Suprianto Pereira (14) iha minutu ’23, golu rua seluk prodús husi Norberto Ximenes (16) iha minutu ’43 no ’63. Enkuantu golu husi Maubale hatama husi jogadór Florindo Magno (19) iha minutu ’56 no ’79.
Notísia relevante: DIT FC ho Relay FC fahe pontu ba malu iha abertura kopa FFTL
Jornalista: Hortencio Sanchez
Editór: Florencio Miranda Ximenes
