iklan

EKONOMIA, HEADLINE

JICA entrega rezultadu finál planu mestre dezenvolvimentu estratéjiku portuáriu ba APORTIL, I.P

JICA entrega rezultadu finál planu mestre dezenvolvimentu estratéjiku portuáriu ba APORTIL, I.P

Reprezentante JICA no Resposável ba projetu planu mestre estatéjiku dezenvolvimentu portuáriu Timor-Leste, Ujike Keisuke entrega rezultadu finál planu mestre dezenvolvimentu estratéjiku portuáriu iha Timor-Leste ba Prezidente, APORTIL, I.P José de Oliveira Leong, iha salaun MTK, Caicoli, sesta (24/05/2024). Imajen Tatoli/Francisco sony

DILI, 24 maiu 2024 (TATOLI)—Ajénsia Kooperasaun Internasionál Japaun (JICA, sigla inglés), sesta ne’e, entrega rezultadu finál planu mestre dezenvolvimentu estratéjiku portuáriu iha Timor-Leste ba Autoridade Portuáriu Timor-Leste, Institutu Públiku (APORTIL, I.P).

Planu mestre ne’e dezenvolve husi JICA ne’ebé serbisu hamutuk ho Ministériu Transporte no Komunikasaun (MTK).

Reprezentante JICA no Resposável ba projetu planu mestre estatéjiku dezenvolvimentu portuáriu Timor-Leste, Ujike Keisuke, konsidera, transporte marrítima importante tebes ba dezenvolvimentu ekonómiku, espesialmente ba nasaun sira-ne’ebé iha depedénsia maka’as ba nesesidade bázika importasaun.

“Ha’u agradese ba rezultadu finál husi projetu planu mestre kona-ba dezenvolvimentu estartéjiku portuáriu iha Timor-Leste, ne’ebé ohin aprezenta no entrega ona ba MTK liuhusi APORTIL, I.P. Ami espera planu ne’e sei uza iha futuru,” Ujike Keisuke, hateten liuhusi diskursu iha salaun MTK, Caicoli.

Projetu ne’e bele fasilita dezenvolvimentu portu ho efisiente no efikásia ho objetivu hodi dezenvolve polítika abrajente ba dezenvolvimentu portu, liu-liu portu sira-ne’ebé identifikadu, inklui projetu ne’e propoin mellora planu asaun funsionamentu APORTIL, I.P.

Prezidente, APORTIL, I.P José de Oliveira Leong, hateten, estudu ba projetu ne’e liuhusi serbisu hamutuk ho JICA desde iha tinan 2022 to’o 2024, ne’ebé rezultadu hatudu ba prioridade portu lima.

“Planu mestre ida-ne’e sai nu’udar matadalan ida ba dezenvolvimentu portuáriu sira iha Timor-Leste,” nia akresenta.

Iha fatin hanesan, Diretór Jerál MTK, Constatino Soares Pereira, agradese ba JICA no tékniku sira hotu ne’ebé halo esforsu ohin loron bele iha rezultadu di’ak.

JICA hahú halo estudu viabilidade ba portu Cairabela

Diretór Infraestrutura APORTIL, I.P, Constâncio Freitas, hateten, projetu husi planu mestre ne’e tau prioridade ba portu lima hanesan Cairabela Baucau, Beaço Viqueque, Suai Covalima, Com Lautém no Betano Manufahi, maibé entre sira ne’e, Cairabela, Beaço no Suai mak sai prioridade liu.

“Entaun husi rezultadu ohin ne’e iha fulan-outubru fulan oin, JICA kontinua halo uluk estudu viabilidade ba portu Cairabela durante tinan-ida,” nia informa.

Estudu viabilidade ba uluk portu Cairabela tanba iha ne’ebá sai hanesan sentru lojítiku nasionál ba munisípiu haat hanesan Manatuto, Baucau, Viqueque no Lautém.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!