DILI, 24 maiu 2024 (TATOLI) – Responsavel Merkadu Manleuana, Elvino Mario do Santos, dehan vendedór sira hamutuk 47 mak laiha fatin negósiu maibé Munisípiu Dili esforsu buka fatin ba sira atu faan sira nia sasan ho dignu.
“Vendedór na’in 47 ne’ebé fatin laiha ne’e, ami buka hela fatin ba liu kotuk ne’eba, maibé sira lakohi hakarak iha oin, maibé espasu iha oin ne’e la sufisiente ona atu sira faan iha ne’eba”, Elvino Mario do Santos ba TATOLI iha merkadu Manleuana, ohin.
Nia salienta, fatin laos laiha liu ba sira atu halo negósiu, maibé fatin ne’e iha no Governu mós atu alarga tan iha kotuk, atu muda sira ba ne’eba hodi hala’o sira nia negósiu ho di’ak.
“Uma sira iha merkadu ne’e faan sasan ai-fuan, modo sira, inklui obralan no uma rua iha sorin ne’e warung, depois espasu ba fali leten ne’e faan sasan fos-rai sira, maibé iha leet sira ne’e ami muda hotu sira ne’ebé mak mai hosi aimutin hodi halao sira-nia negósiu”, nia esplika.
Nia afirma, Governu muda ona vendedór sira hosi Aimutin, Postu Penal no São Miguel mai iha Manleuana no sira faan sasan to’o tuku 18:00, depois kalan sira fila ba idaidak nia uma, dader mak sira mai loke fila fali, tanba iha merkadu ne’e PAMD tau seguransa atu kontrola vendedór sira nia sasan.
Totál vendedór sira iha merkadu Manleuna hamutuk 213 ne’ebé mai hosi merkadu Aimutin, Eis Merkadu Comoro, Postu Penal no São Miguel.
Jornalista : Felicidade Ximenes
Editór : Zezito Silva
