DILI, 25 maiu 2024 (TATOLI)—Veteranu Timor-Leste hato’o nia sentidu solidaridade ba fujitivu, Arnolfo Teves Jr ne’ebé agora Estadu Timor-Leste halo hela prosesu estradisaun ka haruka filafali ba nia nasaun orijen, Filipina.
“Tribunál tenke haree didi’ak, tetu di’diak lei, labele foti kontráriu, foti buat ne’e loloos para ema iha mundu bele fiar ita, se lae ema la fiar ita. Lei tenke haree didi’ak, lei kuandu la haree di’diak naran nasaun nian ne’e monu. Governu tenke halo buat ne’ebé di’ak, Governu tenke tetu di’diak para buat ne’e bele la’o di’ak,” Reprezentante Veteranu, Ernesto Fernandes ‘Dudu’, hateten liuhusi konferénsia imprensa, ne’ebé hala’o iha Timor Lodge, sábadu ne’e.
Notísia relevante : Fujitivu Arnolfo Teves Jr haruka karta aberta ba PM Xanana
Ernesto Fernandes dehan, problema Arnolfo Teves Jr ne’e hanesan problema sériu ne’ebé Governu Timor-Leste tenke konsidera no veteranu hotu tenke kompreende situasaun ne’e, tanba ne’e kona-ba dignidade Estadu tanba Timor-Leste nia Konstituisaun no lei laiha pena de morte no prizaun perpétua.
“Ita tenke haree ema-nia nasaun orijen, ema ne’e sé, sira-nia pena ne’e todan ka kama’an, se todan labele haruka nia fila, se kama’an ne’e bele, entaun ita tetu lai, bá mak nia mate sé mak responsabliza tanba nia mai ita-nia rai. Ida-ne’e mak problema ba ha’u hanesan veteranu no husu ba veteranu tomak atu kompreende situasaun ne’e. Ema ne’e tama mai ita-nia nasaun, ita mak simu, se ita haruka fila mak nia bá mate hanesan mós ita mak oho, ne’ebé haree didi’ak lei ne’e para labele hafoer ita-nia nasaun ,” nia akresenta.
Iha fatin hanesan, Veteranu, Zacarias de Família ‘Mauputo’, haktuir, Arnolfo Teves Jr hetan presegisaun husi nia rai Filipina maka nia halai mai Timor hodi husu azilu polítiku hanesan mós uluk maluk balun ne’ebé halai sai bá rai-li’ur tenke tuir duni prosesu justisa hanesan ne’e.
“Buat sira ne’e tenke tetu tanba ita ko’alia direitu umanu, ita tenke haree didi’ak ida-ne’e, tanba nia hakarak husu azilu polítiku maka nia mai para pelu menus ita tenke salva, maibé tenke liuhusi justisa ita tenke hatuur loloos no haree los buat ne’e, para oinsá bele ho forma ida ne’ebé loloos ita-nia lei buat sira hotu, se ita haruka nia bá para mate, ita mós tenke haree justisa para hatuur lei ne’e loloos para haree di’diak kazu ne’e. Tanba nia mai atu salva nia moris mak nia halai to’o tiha mai iha ne’e,” nia tenik.
Jornalista : Natalino Costa
Editora : Julia Chatarina
