VIQUEQUE, 25 maiu 2024 (TATOLI)-Sekretáriu Ezekutivu Konsellu Nasionál Veteranu Munisípiu Viqueque, Daniel Sarmento “Fogeti”, preokupa tebes haree kondisaun estrada liga husi área Belo bá vila antiga postu Viqueque Vila ne’ebé ho kondisaun aat no nakonu tahu kuaze tinan barak.
“Estrada parte Vila laran iha área Belo edifísiu Banku Nasionál Komérsiu Timor Leste (BNCTL, sigla portugés) ninia oin to’o área Lugatoi ne’e estrada nasionál mak kondisaun a’at ka kuak mesak booboot, iha tempu udan ita ho motór no karreta namdoras hotu tanba estrada ne’e nakonu ho tau. Iha vila laran maka kondisaun hanesan ne’e ita maka sente moe tanba ne’e kapitál Viqueque”, Daniel Sarmento “Fogeti”, hateten ba Agência Tatoli, iha postu Viqueque Vila, ohin
Ho nune’e nia dehan, estrada ne’ebé naruk purvolta metru 100-resin fasil atu rezolve hodi fasilita ema ho tranporte públiku inklui ema ho la’o ain sira-ne’ebé halo movimentu iha Viqueque Vila laran.
“Tanba sa maka to’o agora Governante sira seidauk bele rezolve. Ka veteranu Viqueque balun maka halo inpedimentu karik, ida-ne’e ami seidauk simu informasuan ruma. Se ema balu maka hatene veteranu mak impede halo keixa ba ami konsellu veteranu, ami maka sei prosesu autór ne’ebé halo impedementu. Tanba ne’e, ita konsidera impedimentu ba prosesu dezenvolvimentu ne’ebé ba ami konselluu la tolera”, nia akresenta.
Husu Governu no autoridade munisípiu buka dalan hodi reabilita estrada vila lara atu labele difikulta movimentu sira tanba estrada referida lokaliza kedas iha kapitál Viqueque.
Iha fatin ketak, Prezidente Autoridade Munisípi Viqueque, Francisco C.S de Gonzaga Soares, afirma kona-bá estrada iha Viqueque Vila laran autoridade halo negosiasaun lubuk mak foin agora hetan empreza ida halo hela normaliza Lugatoi hodi fasilita tranporte liuliu ambulánsia.
“Estrada iha parte Beloi laran ne’ebé oin loron sai ita hotu nia preokupasaun ne’e. antes ita tama ba komemorasaun ha’u husu ajuda ba empreza ne’ebé halo normalizasaun ba dalan Lugatoi mak ajuda aterru rai henek. Maibé, agora udan hela de’it a’at fila fali. Nune’e ha’u husu ba Governu sentrál aselera estrada nasionál hahú postu Ossu to’o Viqueque Vila atu iha netik mudansa ba infraestrutura estrada nian”, nia afirma.
Kona-bá preokupasaun ne’e autoridade sei kontinua halo negosiasaun ho Ministériu Obras Públiku (MOP) hodi buka solusaun ba dalan área Beloi.
Estrada área Beloi
Kona-ba estrada ne’e Eis Diretór Servisu Obras Munisípiu Viqueque, Mario do Rego, konta kona-ba Estrada área Beloi ne’ebé daudaun kondisaun aat nakonu ho tahu ne’e uluk empreza Modena Unip Lda mak halo reabilitasaun husi beskem to’o iha Klínika postu Viqueque Vila nian oin hamutuk kilométru haat.
“Iha kontratu projetu reabilitasaun tinan 2013 ne’ebé iha kontratu laran ne’e empreza halo saluran, trotoar no aterru estrada laran ne’ebé momentu ne’ebá Governu aloka orsamentu milaun $4 ba mós projetu emerjénsia sira iha postu Ossu. Iha kontratu laran latau orsamentu ba alkatraun,nune’e empreza labele halo aspaltiku sira servisu de’it bazeia kontratu. Tanba ne’e mak agora ita haree estrada sai a’at ne’e to’o agora seidauk iha kontratu foun ruma”, nia konta.
Jornalista : Vitorino Lopes da Costa
Editór : Florencio Miranda Ximenes
