iklan

BAUCAU, HEADLINE, MUNISÍPIU, POLÍTIKA

CFP fahe informasaun kona-ba papél funsionáriu iha Baucau

CFP fahe informasaun kona-ba papél funsionáriu iha Baucau

Komisaun Funsaun Públika fahe informasaun kona-ba papél no funsaun funsionáriu públiku iha munisípiu Baucau, segunda (27/05). Imajen Agência TATOLI/Natalino Belo.

BAUCAU, 27 maiu 2024 (TATOLI) – Komisaun Funsaun Publika (CFP, sigla portugés) segunda ne’e, disemiña kona-ba papél funsionáriu públiku nune’e iha koñesementu relasiona ho funsionamentu mákina estadu iha nível munisípiu.

Komisáriu Komisaun Funsaun Públiku, José Telo Cristavão, esplika, objetivu prezensa iha munisípiu Baucau nu’udar parte husi serbisu CFP nian ne’ebé kada-tinan iha devér atu halo atividade diseminasaun iha nivel munisípiu hanesan fó hanoin ba funsionáriu hotu atu kumpre oras serbisu.

“Prezensa Komisaun Funsaun Públiku atu mai halo formasaun aumesmu tempu sosailiza informasaun atu funsionáriu sira idak-idak bele hatene nia papél,” Komisáriu Komisaun Funsaun Públiku hateten iha Vila Nova.

Ekipa CFP liuhusi atividade referida esplika kona-ba Dekretu-Lei númeru 84/2023 kona-ba papél funsaun públiku no prosedimentu hodi asegura profesionalismu ne’ebé efisiénsia no efikasia ba funsionáriu públiku sira iha munisípiu Baucau.

Dekretu lei 84 hateten, funsionáriu hotu-hotu husi nível postu too nasionál iha direitu atu hatene no obrigasaun kumpri oras 48 kada semana hodi garante mákina estadu iha nível munisipál.

José Cristavão husu ba funsionáriu hotu espisiál munisípiu Baucau tomak, atu atu nafatin hala’o kna’ar ho profisionál nune’e bele hatudu prestasaun iha fatin serbisu.

Sekretáriu Munisipál Asuntu Planeiamentu Dezenvolvimentu Integradu Munisipál Baucau, Eduardo Filipe Ximenes, hateten prezensa CFP liuhusi atividade diseminasaun refereda importante, tanba ajuda funsionáriu liuliu kargu xefia sira bele intende papél serbisu tanba foin asume iha inísiu tinan ne’e.

“Matéria sira-ne’e importante, ita sei implementa iha serbisu nível munisípiu,” Eduardo Filipe argumenta.

Matéria importante sira-ne’ebé hato’o husi Komisaun Funsaun Públiku desentralizasaun, finansa públika, aprovizionamentu no planeiamentu nune’e importante atu kada funsionáriu sira hatene no aplika tuir diresaun idak-idak nian.

Jornalista   : Natalino Belo 

Editór         : Evaristo Soares Martins 

iklan
iklan

Leave a Reply

iklan
error: Content is protected !!