Top

Deputada PD husu MJ solusiona sistema rejistu kadastrál

Deputada PD, Sancha M Tilman. Imajen/TATOLI

DILI, 27 maiu 2024 (TATOLI)—Deputada Partidu Demokrátiku (PD), Sancha Tilman, husu Governu liuliu Ministériu Justisa (MJ) atu solusiona sistema rejistu kadastrál ne’ebé hetan avária.

“Konforme fonte informasaun kredível ne’ebé ha’u asesu durante fim de semana, sistema refere asegura dadus kuaze rihun 308 parsela (parsela rai) ne’ebé mak rekolla husi sistema nasionál kadastrál, kauza husi sistema kadastrál asesu ladi’ak husi tinan 2020 to’o agora, tanba amesadu husi keima ka eletrisidade lakan-mate. Entaun, sistema nasionál kadastru labele asesu informasaun iha sistema laran hodi atraza posesu rekoñesimentu ba títulu propriedade,” nia levanta liuhusi reuniaun plenária Parlamentu Nasionál, segunda ne’e.

Nia dehan, husi parte diresaun nasionál kadastrál submete ona proposta ba Ministériu Justisa (MJ) atu sosa server foun hodi bele transfere dadus sira hotu ba iha sistema foun, maibé to’o trismestre daruak ona maibé seidauk hetan resposta husi ministériu.

“Nune’e, husu ba Ministériu Justisa atu bele toma atensaun ba asuntu refere, atu bele fasilita serbisu iha diresaun nasionál sistema nasionál kadastrál ba ita hotu nia interese, liuliu ba iha área rekoñesimentu títulu propriedade,” nia dehan.

Vise Ministru ba asuntu Parlamentár, Adérito Hugo da Costa, rejista hela preokupasaun sira-ne’e no sei envia ba ministériu tutela.

Jornalista : Nelson de Sousa

Editór        : Cancio Ximenes

Publisidade

Leave a Reply

Latest Post

error: Content is protected !!