Mákina avaria, ospitál internamentu Viqueque la atende pasiente teste raan kompletu
VIQUEQUE, 27 maiu 2024 (TATOLI)- Xefe Departamentu Analista Servisu Internamentu Munisípiu Viqueque, Marcos Martins da Silva, informa, mákina Celldya ne’ebé uza ba teste raan kompletu daudaun kondisaun avaria, nune’e labele utiliza iha ospitál internamentu munisípiu Viqueque hodi halo teste raan kompletu ba pasiente sira.
“Mákina kona-ba teste moras sira hanesan malaria, raan midar, kimia raan, HIV-SIDA no siplisia kondiasaun di’ak hotu, maibé mákina teste ba raan kompletu nian mak ita-nia avaria kuaze tinan ida-resin ona tanba mákina ne’e laiha reazente. Nune’e, ami labele uza hodi teste ba pasientes sira-ne’ebé presiza koko sira-nia raan”, Marcos Martins da Silva, hateten ba Agência TATOLI, iha sentru saúde postu Viqueque Vila, ohin.
Kona-ba mákina ne’ebé avaria nia dehan, halo ona pedidu ba nasionál hodi halo manutesaun, maibé tékniku espesifíku ba mákina Celldya ba tiha eskola iha rai li’ur tanba ne’e mákina referidu to’o agora seidauk bele halo manutensaun di’ak.
“Tanba mákina ne’e importante tebes hodi teste ba raan bainhira pasiénte sira baixa internamentu presiza halo teste ba sira-nia raan ami tenke halo tranferénsia pasiente ba Ospitál Referál Baucau hodi fó teste tanba ita-nia mákina iha ne’e avaria”, nia akresenta.
Kona-ba utiliza mákina Celldya halo teste ba raan mutin no raan mean hodi identifika infesaun moras sira-ne’ebé iha ema nian-laran.
Tipu makína sira-ne’ebé analista sira uza iha ospitál internamentu Viqueque maka hanesan Celldya, Genexpert, Fuji Film,Gluco test, Hentrifugre Hematoncrto.
Alende ne’e, nia dehan, material kona-ba teste dengue agora laiha estoke,nune’e halo pedidu ba nasionál, maibé stouk iha nasionál mós hotu.
“Materiál teste ba dengue ita iha doos hamutuk 15, foin lalais ami uza hotu tiha, ami halo fali ona pedidu rekizasaun ba nasionál, maibé estoke iha nasionál mós laiha. Karik kazu dengue ita iha ami labele fó teste tanba materiál hotu, ha’u espera tempu badak nasionál bele haruka mai fali”, nia afirma.
Jornalista : Vitorino Lopes da Costa
Editór : Florencio Miranda Ximenes
