EDUKASAUN, BAUCAU, HEADLINE, MUNISÍPIU

EBF Vila Nova Baucau menus sala aula no profesór

EBF Vila Nova Baucau menus sala aula no profesór

Estudante EBF Vila Nova Baucau tuir hela prosesu ensinu no aprendizajen iha klase, tersa (28/05). Imajen Agência TATOLI/Natalino Belo.

BAUCAU, 28 maiu 2024 (TATOLI) – Ensinu Baziku Filiál (EBF) Vila Nova, Baucau menus sala aula no menus profesór nune’e difikulta prosesu aprendizajen.

Kordenadora EBF Vila Nova, Dulce Doutel Ximenes, esplika, difikuldade referida hasoru tanba eskola ne’e akumula ho totál estudante 1.054 nune’e obrigadu tenke fahe ba tornu tolu hanesan dadeer no lokraik.

Tornu tolu iha eskola ne’e fahe hanesan sestu no kintu-anu iha dadeer husi oras 08:00 to’o 12:30, kuarta no terseiru-anu kontinua iha turnu meudia husi oras 12:40 to’o 17:00, segundu-anu husi 12:40 to’o 14:30 no primeru-anu husi 14:40 to’o 17:00.

“Iha ami-nia sala barullu liu, tanba estudante barak profesó ko’alia iha oin fó esplikasaun iha moos ami larona,” Koordenadora EBF Vila Nova Baucau hateten iha Vila Nova, tersa ne’e.

Ho problema sala aula menus, parte dirijente eskola tenke koloka kada aula alunu hamutuk 50 husi primeiru to’o sestu-anu, ne’ebé tuir regra loloos kada aula tenke koloka de’it estudante na’in-25.

Dulce Ximenes, konsidera, bainhira kada aula estudante na’in-50 fó impaktu ba profesór la domina estudante, tanba labele kontrola ho estudante durante prosesu aprendizajen.

“Ami profesó la domina estudante sira, tanba estudante barak liu, primeru to’o segundu-anu presiza la’o-tuir hanorin ho di’ak, maibé sala ida barak hanesan nee profesór labele domina alunu sira,” Dulce Doutel Ximenes akresenta.

Alende ne’e, EBF Vila nova Baucau mos menus profesór nune’e difikulta alokasaun ba kada klase ne’ebé fahe ba tornu tolu.

“Ami hakarak aumenta tan profesór na’in-haat nune’e ami fahe,” Dulce Ximenes rekomenda.

EBF Vila Nova Baucau iha sala aula 13 ne’ebé akumula estudante 1.054, kompostu husi mane 549, feto 505 ho totál profesór na’in-31 kompostu husi permanente na’in-30 no voluntáriu na’in-ida.

Jornalista : Natalino Belo 

Editór        : Evaristo Soares Martins 

iklan
iklan

Leave a Reply

iklan
error: Content is protected !!