DESPORTU, HEADLINE

Klube Fitun Ramelau FC manán Sousa United FC 2-0

Klube Fitun Ramelau FC manán Sousa United FC 2-0

Jogu Futebol Kopa Maun Boot Kayrala Xanana Gusmão 2024, Fitun Ramelaun Letefoho kontra Sousa United FC, iha estadiun Munisípal Dili, segunda (28/05). Imajen Tatoli/Francisco Sony

DILI, 28 maiu 2024 (TATOLI) – Ekipa istimadu husi Munisípiu Ermera Fitun Ramelau FC susesu manán nia adversáriu Sousa United FC ho rezultadu 2-0, iha jogu kontinusaun kopa Maun Boot Kay Rala Xanana Gusmão ne’ebé realiza iha Estádiu Munisipál Dili, tersa lokoraik ne’e.

Bainhira jogu hahú ekipa rua lansa kedan kontra no atake ba malu tuir tékniku no abilidade ekipa ida idak nian atu buka se loos mak hatama golu.

Ramelau mantein iha nia pozisaun ho ambisaun maka’as oinsa atu prodús golu, Sousa mós lansa kontra no atake ne’ebé maka’as oinsa trava Ramelau nia atake.

Maske Sousa halo presaun Ramelau la hakfodak no aumenta tan velosidade jogu ho nune’e iha minutu 13 jogadór Ramelau nia esforsu la hela hanesan esforsu tanba jogadór Sebastião de Jesus (77), lees ona rede Sousa hodi muda rezultadu ba 1-0. Golu ne’e halo Sousa tenke servisu maka’as liutan oinsa atu responde golu ruma hodi halo empata jogu ne’e.

Jogu Futebol Kopa Maun Boot Kayrala Xanana Gusmão 2024, Fitun Ramelaun Letefoho kontra Sousa United FC, iha estadiun Munisípal Dili, segunda (28/05). Imajen Tatoli/Francisco Sony

Esforsu Sousa nian hela de’it ho naran tanba Ramelau nia defeza nunka fó fatin ba avansadu Sousa atu tama tuir sira nia hakarak, guarda rede Ramelau mós sempre salva bola barak ne’ebé mak lansa husu avansadu Sousa nian, nune’e Sousa nafatin hela ho rezultadu rero.

Ho jogu ne’ebé brillante no amizade, iha minutu 22 jogadór Ramelau hatudu tan nia forsa liuhusi jogadór Zermias da Silva (6) prodús tan golu ida hodi hametin rezultadu ba 2-0.

Golu ne’e hanesan golu ikus ba ekipa rua iha minutu primeira parte no Ramelau mak provijoriu lidera jogu.

Hakur ba segunda parte ekipa rua nafatin lansa kontra no atake ba malu ho forsa ne’ebé maka’as maibé nafatin iha forsa ne’ebé hanesan to’o minutu normál termina laiha golu ruma mak akontese.

Ho nune’e vitoria hela ba Ramelau hodi rekolla pontu tolu no Sousa tenke hela ho derrota no tenke elemina ona husi faze grupu.

Vitoria ne’ebé Ramelau hetan lori ekipa ne’e ultrapasa ona ba oitavu finál ho pontu neen, nune’e iha grupu C provijoriu lidera husi Coach Eleven ho pontu neen, pozisaun terseiru Naimeco FC ho pontu ida no Souza FC okupa pozisaun ikus liu ho pontu ida.

Tuir rezultadu ne’ebé iha grupu C nian Coach Eleven ho Fitun Ramelau konfirmadu ona ultrapasa ba faze oitavu finál. Enkuantu klube rua Naimeco ho Sousa obrigadu tenke elemina ona hodi hein fali jogu seluk iha tinan oin.

Jogu entre ekipa rua ne’e lidera husi árbitru Francisco Pereira, juiz liña Filomeno da Silva, Duarte Henrique no árbitru rezerva Fernando da Costa.

Notisia relevante: Kopa Xanana, Warikoan FC ‘lulun’ Irmão Timor 2-0

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!