COVALIMA, HEADLINE

Kooperativa Halibur Fini rai produtu to’o aat tanba ema la sosa

Kooperativa Halibur Fini rai produtu to’o aat tanba ema la sosa

Imajen google

COVALIMA, 28 Maiu (TATOLI) – Prezidente Kooperativa Halibur Fini iha Covalima, Justino dos Reis, preokupa tanba fini batar no hare ne’ebé sira rai iha armazein to’o fohuk de’it, tanba agrikultór sira la sosa, maibé sosa fali fini iha Bobonaro.

“Ami aprezenta preokupasaun ba Konsellu Veteranu Covalima atu serbisu hamutuk ho Agrikultura Covalima, nune’e bainhira epóka atu kuda batar no hare sosa de’it ami-nia fini ne’ebé rai iha armazein kooperativa”, Justino dos Reis hatete iha Tabakolot, ohin.

Kooperativa Halibur Fini kria atu haburas ekonomia, liuliu ba família veteranu grau 0 a 3 no grau 4 a 7 hodi sustenta sira selu oan sira-nia eskola. Kooperativa ne’e estabelese tanba hetan apoiu fundu husi konsellu veteranu hamutuk rihun $20, ne’ebé husi verba ne’e rihun $10 uza halo konstrusaun armazein atu rai fini no rihun $10 uza ba sosa fini batar no hare hodi rai iha kooperativa.

Iha sorin seluk, Prezidente Konsellu Veteranu Covalima, Osório Soares ‘Mausoko’, konsidera preokupasaun husi prezidente Kooperativa Halibur Fini no nia sei koordena ho Diretór Agrikultura Covalima atu sosa fini iha kooperativa.

“Ha’u anota prezidente nia preokupasaun, ha’u sei serbisu hamutuk ho Servisu Agrikultura, nune’e bainhira agrikultór sira atu sosa fini, sosa de’it iha armazein kooperativa”, nia asegura.

Kooperativa Halibur fini kria husi veteranu ho grau 0 a 3 no grau 4 a 7, ne’ebé hetan osan husi konsellu veteranu liuhusi fundu Servisu Apoiu Sosiedade Sivíl no Auditória Sosiál (SASCAS) atu hakbiit veteranu sira-nia ekonomia família.

Kooperativa Halibur Fini lokaliza iha suku Lepo, postu Zumalai, no inaugura husi reprezentante eis-administradór munisípiu Covalima, Francisco Mendonça ‘Ran Nakali’, iha 27 Setembru 2023.

Lembra katak, iha 2023, SASCAS apoiu orsamentu ba CCLN hamutuk rihun $38, husi montante ne’e, rihun $10 apoia ba edukasaun ba família veteranu grau 4 a 7 no osan rihun $20 atu tulun ba veteranu sira halo atividade ekonomia no rihun $8 apoia ba administrasaun.

Jornalista: Celestina Teles

Editora: Maria Auxiliadora

iklan
iklan

Leave a Reply

iklan
error: Content is protected !!