EKONOMIA, HEADLINE

MAE-MAPPF orienta PAM sira koopera ho tékniku agríkola hodi hasa’e produsaun rai-laran

MAE-MAPPF orienta PAM sira koopera ho tékniku agríkola hodi hasa’e produsaun rai-laran

Ministru Administrasaun Estatál, Tomás do Rosário Cabral. Imajen/Tatoli

DILI, 28 Maiu 2024 (TATOLI) – Ministériu Administrasaun Estatál (MAE) no Ministériu Agrikultura, Pekuária, Peska no Floresta (MAPPF) organiza enkontru ho Prezidente Autoridade Munisipál (PAM) sira hodi orienta sira atu reforsa serbisu iha setór agríkola hodi hasa’e produsaun iha rai-laran.

Ministru Administrasaun Estatál, Tomás Cabral, hateten serbisu integradu ne’e akumula responsabilidade ministériu hotu nian iha Nonu Governu, tanba ne’e, MAE ho MAPPF hasoru malu ho PAM sira hodi orienta sira serbisu hamutuk ho tékniku sira iha baze hodi foku ba área agrikultura.

“Serbisu atu kotrola kualidade ba produsaun sira iha rai-laran ne’e importante tebes. Tanba ne’e, tenke iha serbisu integradu ida entre parte hotu, inklui Prezidente Autoridade Munisipál sira. Presiza iha kooperasaun di’ak ho parte tékniku sira, nune’e bele garante kualidade ba ita-nia produsaun sira ne’ebé agrikultór sira prodús iha kada munisípiu”, Tomás Cabral hateten iha ámbitu enkontru, iha salaun GMN, Bebora, ohin.

Ba povu nia interese no Estadu nia di’ak, governante ne’e salienta katak parte hotu tenke fó liman ba malu hodi lori produsaun sira ne’ebé komunidade agrikultór sira prodús ne’e tenke garante iha futuru, tanba planu Governu nian ba 2025 ne’e ninia orsamentu sira sei tau importánsia mós ba agrikultura.

Planu Governu nian katak, hahú 2025, hasa’e produsaun natar mezmu la 100% pelu menus bele iha 50% ate 60% ba rai sira ne’ebé kategoria iha poténsia ba halo to’os ka natar ne’e tenke utiliza ho efetivu. Atu atinje mehi sira ne’e, MAE presiza mak mapeamentu ida integradu, nune’e bele atinje alvu.

Nia salienta relasiona ho ema barak dehan pateka ne’ebé fa’an iha supermerkadu sira ne’e mai husi Suai-Covalima, maibé tuir nia, pateka sira ne’e mai husi Atambua, tanba to’o agora seidauk iha relatóriu ida husi Prezidente Autoridade Munisipál Covalima kona-ba produsaun sira ne’e.

“Tanba saida maka ha’u la fiar katak pateka ne’e mai husi Suai, tanba to’o agora ha’u seidauk simu relatóriu ida husi ha’u-nia Prezidente Autoridade Covalima kona-ba produsaun saida de’it maka Suai prodús ona, inklui pateka ne’e rasik. Tanba ne’e, ha’u dehan pateka sira ne’e sei mai husi Atambua. Bainhira relatóriu to’o ona iha ha’u nia liman, ha’u foin fiar”, afirma.

Ba Tomás Cabral, prezidente autoridade sira hotu iha papél boot ida atu serbisu hamutuk ho Ministériu Agrikultura hodi aselera serbisu ba hasa’e produsaun iha rai-laran.

Nune’e mós, Ministru Agrikultura, Pekuária, Peska no Floresta, Marcos da Cruz, konsidera katak kooperasaun entre liña ministeriál ne’e atu reforsa serbisu hodi hadi’a povu nia moris liuhusi hasa’e produsaun.

Ministériu Agrikultura iha vizaun ida ba futuru atu hasa’e kuantidade ai-han no nia kualidade atu orienta ba merkadu sira, nune’e bele hasa’e família agrikultór sira hodi bele hadi’a sira-nia moris. Ne’e duni, liuhusi hasoru malu ida ne’e nu’udar dezafiu ida ba hotu-hotu atu iha nafatin responsabilidade hodi garante progresu sira iha futuru, nune’e servisu Agrikultura, Pekuária, Peska no Floresta iha futuru bele hetan produsaun ida di’ak liu.

Prezidente Autoridade Aileu, João Bosco dos Santos, deklara katak ninia parte prontu atu serbisu hamutuk ho parte hotu, liuliu iha setór agríkola, nune’e bele garante produsaun di’ak ba rai ida ne’e.

“Hanesan autoridade ami preokupa maka atendimentu hodi responde ba nesesidade Governu lokál nian. Ita hakarak atu natar no to’os sira iha munisípiu bele utiliza hotu, maibé dalabarak ekipamentu sira maka la sufisiente atu responde ba. Tanba ne’e, ami husu ba tinan oin ne’e tenke iha kompromisu duni katak ita hakarak hasa’e kualidade no kuantidade produsaun rai-laran tenke apoiu ho fasilidade adekuadu mós”, sujere.

Atu responde ba nesesidade rai-laran, liuliu ba produsaun hare maka Ministériu Agrikultura, Pekuária, Peska no Floresta hakarak hasa’e, kada tinan, kuantidade natar iha kada munisípiu rihun 17, nune’e bele atinje, entre 2024 no 2028, ektare rihun 50.

Notísia relevante: MAPPF sei kolabora ho MAE hasa’e produsaun agríkola

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!