HEADLINE, SOSIEDADE SIVĺL

Vizita Papa Francisco hanesan forsa ida ne’ebé dudu ema hodi kontribui ba pás

Vizita Papa Francisco hanesan forsa ida ne’ebé dudu ema hodi kontribui ba pás

Reprezentante Santa Sé iha Timor-Leste, Monseñor Marco Sprizzi. Imajen Tatoli/Francisco Sony

DILI, 28 Maiu 2024 (TATOLI) – Núnsiu Apostóliku Vatikanu iha Timor-Leste, Monseñor Marco Sprizzi, enkoraja sarani sira atu prepara aan ho ksolok, gratidaun no esperansa hodi simu Papa Francisco nia vizita ne’ebé bele sai hanesan forsa ida ne’ebé dudu ema hosi fuan-laran hodi kontribui ba pás.

“Hanesan sarani di’ak, sidadaun di’ak, preparasaun sira tenke integrada hodi simu Santu Padre ho pás, rekonsiliasaun, nune’e bensaun sira bele sulin ba família no ema seluk liuhusi ita-nia moris loroloron”, reprezentante Vatikanu ne’e hateten.

Monseñor Marco Sprizzi nia observasaun kona-ba preparasaun Governu no Estadu Timor-Leste nian ba vizita Papa Francisco ne’e eselente tebes.

“Governu no Estadu Timor-Leste halo hela preparasaun ida estraordinária no eselente atu povu Timor-Leste bele realiza sira-nia mehi hasoru Papa Francisco ho matan rasik no besik liután iha Papa nia sorin ho orgullu. Papa Francisco mai ba povu, tan ne’e gastu sira ba preparasaun ne’e atu povu timoroan mai husi foho, aldeia sira bele iha kondisaun atu besik ho Papa ho maneira saudavel, seguru no lojistikamente adekuadu”, Marco Sprizzi realsa.

Iha sorin seluk, Ministru Administrasaun Estatál, Tomás do Rosário Cabral, husu ba Prezidente Autoridade Munisípiu sira halo serbisu maka’as hodi apoia programa vizita Papa Francisco nian hodi kontrola sarani sira ne’ebé sei mai partisipa misa iha Tasi-Tolu.

“Ba Prezidente Autoridade Munisipál sira hotu atu kontinua serbisu hamutuk ho parte hotu hodi halo kontrolu ba ita-nia sarani sira ne’ebé atu mai partisipa misa iha Tasi-Tolu ne’e ho respeitu no kumpre protokolu ne’ebé iha, nune’e ita bele hatudu ba mundu katak Timór nasaun katólika no nasaun foun iha mundu, maibé ninia povu mesak ema respeitozu”, governante ne’e dehan iha Bebora.

Ministru salieta katak preparasaun ba vizita Papa Francisco la’o kapa’as tebes, tanba Governu koopera ho igreja, PAM no autoridade suku sira, komunidade hodi hadi’a fatin atu simu amu Papa, inklui bainaka sira husi nasaun viziña Indonézia.

Husi preparatfivu sira ne’ebé halo daudaun ne’e, iha tempu besik Governu sei konvoka enkontru ida ho Bispu Arkidioseze Dili, Dom Virgílio Kardeál do Carmo da Silva, SDB, ho reprezentante Santa Sé iha Timor-Leste, Marco Sprizzi, kona-ba  oinsá atu organiza di’ak liután sarani sira atu simu Papa tenke ho ksolok no iha esperansa.

Aleinde ne’e, Prezidente Autoridade Munisípiu Ermera, José Martins Soares, hateten nia parte halo ona enkontru ho administradór postu sira, Komandante Eskuadra PNTL no amu páróku hotu husi Ermera atu iha desizaun ruma kona-ba preparasaun ba sarani sira antes mai hamutuk iha Dili hodi simu Papa Francisco.

“Ita sei mobiliza sarani sira ho númeru boot kuaze rihun 143 no rihun 70 sei partisipa másima iha Papa Francisco nia vizita. Tanba ne’e, hanesan autoridade presiza halo preparasaun ida másima atu asegura sarani sira husi munisípiu Ermera nia partisipasaun”, dehan.

Lembra katak Konsellu Ministru aprova ona millaun $12 ba preparasaun vizita Papa Francisco iha Timor-Leste.

Vizita pastorál Papa Francisco iha Timor-Leste ne’ebé nia populasaun 96% maioria katólika ne’e,  entre loron 09 no 11 Setembru tinan ne’e.

Notísia relevante: Monseñor Marco Sprizzi louva Estadu TL nia-preparasaun simu Papa Francisco

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!