NASIONÁL, HEADLINE

Kaza Sivíl no Militar PR entrega Bandeira RDTL ba AMRT

Kaza Sivíl no Militar PR entrega Bandeira RDTL ba AMRT

Diretor Ezekutivu AMRT, Jorge Alves 'We Moris'. Imajen/Tatoli

DILI, 29 maiu 2024 (TATOLI)–Kaza Sivíl no Militár Prezidénsia Repúblika (PR) entrega Bandeira Repúblika Demokrátika Timor-Leste (RDTL) ho medida metru tolu ba Arkivu Muzeu Rezisténsia Timorense, Institutu Públiku  (AMRT, I.P).

“Ohin AMRT simu Bandeira nasionál RDTL husi Kaza Militár no Kaza Sivíl Prezidénsia Repúblika nian. Bandeira ne’e ho naruk metru tolu, hahú husi tinan-2002 entaun ita bele dehan tinan-20 resin ona. Sente kontente no apresia ho Prezidénsia Repúblika ne’ebé bele fó konfiansa mai AMRT hodi bele konserva no prezerva Bandeira nasionál RDTL ida-ne’e. Ha’u kongratula Kaza Militar no Kaza Sivíl ne’ebé ohin lori Bandeira ida-ne’e mai entrega ba AMRT,” Diretór Ezekutivu AMRT, IP, Jorge Alves ‘We Moris’, informa iha ninia knaar fatin, kuarta ne’e.

Notísia relevante : AMRT, I.P realiza kompetisaun poezia no animasaun iha ámbitu komemorasaun restaurasaun independénsia

Institutu ne’e planeia no prepara ona hodi halo espozisaun ida ba Bandeira ne’ebé ohin simu.

“Bandeira ne’e mós ita sei halo espozisaun. Ita sei presiza halo armáriu mós metru tolu atu nune’e ita bele halo espozisaun para bainaka internasionál no nasionál sira bele mai haree. Tanba ne’e, Bandeira ida-ne’ebé ema barak fó sira-nia vida no mate hodi ita simu restaurasaun independénsia,” nia tenik.

Aleinde ne’e, AMRT mós hakarak halo espozisaun ba Kofi Anan, ne’ebé mak fo nia-an tomak hodi ko’alia ho komunidade internasionál, liu-liu Indonézia no Portugal hodi aseita no konkorda loron 05 Maiu, nune’e ikus mai Timor-Leste halo referendu.

Nune’e mós, símbolu lafaek no Ai-kruz ne’ebé daudaun ne’e iha arkivu muzeu rezisténsia ne’e ba oin sei halo karta ba estudante sira atu mai haree hodi sira hatene didi’ak nia istória.

“Lafaek ita-nia istória ne’ebé sai illa ida, tanba ne’e mak ita hakarak halo espozisaun ida-ne’e hodi halo mós ho lafaek, tanba istória Timor ne’e lafaek sai illa. Bazeia ba istória Timor, lafaek ne’e hanesan ita-nia avo iha fatin hotu-hotu. Ho ida-ne’e, ami sei informa ba estudante sira hotu husi nível eskolaridade hotu atu mai haree objetu sira,” nia akresenta.

Diretór ne’e konsidera objetu sira-ne’e hola parte iha istória Timor nian, hanesan kruz ne’e mai husi tasmañia ba Sidney no mai Timor-Leste, no kruz ne’e uluk maluk sira-ne’ebé mak iha Austrália sira lori kruz ne’e ba demonstrasaun.

“Entaun signifika katak kruz sai objetu boot loos ba Timor-Leste, no ohin kruz iha Timor-Leste no ita hakarak halo espozisaun para ema hotu bele mai haree, nune’e jerasaun foun sira bele hatene no rekoñese istória sira,” nia relembra.

AMRT, I.P, daudaun ne’e harii ona Bandeira haat hanesan FRETILIN, RDTL, FALINTIL, CNRT ne’ebé hola parte ba prosesu libertasaun nasionál.

“Ita harii Bandeira haat ne’e iha AMRT, I.P nia oin tanba Bandeira haat ne’e ema hotu fó sakrifísiu no ema lubuk mak mate, nune’e Bandeira ne’e tenke harii no Bandeira ne’e hola parte iha prosesu libertasaun,” Diretór reforsa.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!