AMRT, I.P realiza kompetisaun poezia no animasaun iha ámbitu komemorasaun restaurasaun independénsia
DILI, 14 maiu 2024 (TATOLI)–Arkivu no Múzeu Rezisténsia Timorense, Institutu Públiku (AMRT, I.P) sei realiza kompetisaun poezia no animasaun iha ámbitu komemorasaun restaurasaun independénsia ba dala-22.
“Unidade Edukativu responsável ba kompetisaun poezia no animasaun, nune’e AMRT, I.P prevee osan hamutuk $8.300. Entaun, ita prevee kedas orsamentu hodi kobre husi loron 09 to’o 18 maiu. Kompetisaun ne’e ita prevee mós ba kada eskola sira ho apoiu transporte para sira mobiliza estudante sira mai tuir kompetisaun ne’e. Ita mós prevee orsamentu ba animasaun no juri ba konkorrente sira hotu. Atividade ne’e ita responsável tomak, inklui ho prémiu ba konkorrente sira,” Diretór Nasionál Unidade Edukativu no Kultura, Álvaro Rosário Vaconselos, informa ba Agência Tatoli, iha ninia knaar fatin, Caicoli, tersa ne’e.
Manán-na’in ba kompetisaun ne’e sei hetan prémiu ho osan, nune’e manán-na’in dahuluk sei hetan $500, daruak $350 no datoluk $250, enkuantu konkorrente sira ne’ebé la liu iha kompetisaun ne’e hetan $25.
AMRT loke kompetisaun poezia ba estudante sira husi eskola 10, ne’ebé kada eskola delega ema na’in-rua (feto ida no mane ida).
Notísia relevante : AMRT rejista vizitante 1.689 iha janeiru-marsu 2024
Estudante hamutuk 12 husi Eskola Ensinu Sekundáriu Jerál (ESJ) São João Paulo II, ESJ 05 de Maio, ESJ 12 de Novembro, Eskola Sekundária Sagrado Coração de Jesus, Eskola Sekundária Katólika Paulo VI, Eskola Sekundária São José Operário, ESJ 04 de Setembro, Eskola Sekundária Canossa, ESJ 10 de Dezembro, no Eskola Sekundária São Pedro.
“Objetivu husi kompetisaun poezia atu lori ita komemora loron restaurasaun independénsia ba dala-22 iha loron 20 maio agora. Unidade Edukativu mak organiza kompetisaun ne’e no ita mak simu hodi halo divulgasaun no halo konferénsia,” nia akresenta.
Estudante konkorrente husi Eskola Sagrada Coração de Jesus Becora, Lita Adriana, agradese tanba hetan konfiansa bele tuir kompetisaun poezia.
“Agradese tebes ba oportunidade ida-ne’e. Iha kompetisaun ne’e ha’u lori poezia obrigatóriu ne’e ho tema ‘esperansa rasgadas’ no poezia eskolidu ‘um minuto de silêncio’. Ha’u poezia ne’e atu ita bele reflete no hakmatek ho silénsiu hodi hanoin hikas ita-nia eroi sira-ne’ebé fó-an ba mate hodi ohin loron ita goza liberdade,” nia tenik.
Konkorrente husi Eskola Sekundária Colégio Paulo VI, Xavier Gusmão da Silva, apresia tebes tanba bele hola parte iha kompetisaun poezia ida-ne’e.
“Ida poezia obrigatóriu ha’u lori ho tema ‘esperansa rasgadas’ no ida eskollidu ne’e ha’u eskolla ho tema ‘12 Novembru 1991’. Ho emosaun ne’ebé ha’u foti, poezia ne’e ha’u sente apresia tebes ba poeta ne’ebé mak hakerek tanba nia bele promove ona ita-nia istória liuhusi poezia sira ne’e nomós agradese ba eroi sira ne’ebé fó-an ba mate ba rai ida-ne’e,” nia dehan.
Estudante ne’e hili tema “12 Novembru 1991” tanba iha momentu ne’ebá mak joven sira fó-an ba mate iha Santa Cruz hodi defende rai doben Timor-Leste.
Jornalista : Osória Marques
Editora : Julia Chatarina
