iklan

HEADLINE, KAPITÁL

AMRT rejista vizitante 1.689 iha janeiru-marsu 2024

AMRT rejista vizitante 1.689 iha janeiru-marsu 2024

Turista sira husi Austrália ho Ró kruzeiru Le Lapérouse vizita AMRT Dili, kinta (15/09/2022). Imajen Tatoli/António Daciparu

DILI, 14 maiu 2024 (TATOLI)–Arquivo Museu Resistências de Timorense (AMRT) rejista vizitante hamutuk 1.689, kompostu nasionál 912 no internasionál 777 inklui estudante sira, durante janeiru to’o marsu nia-laran.

“Muzeu reziténsia ne’e arkiva hela istória Timor-Leste nian. Tanba ne’e, AMRT nakloke ba públiku hodi asesu ba espozisaun no nafatin prezerva istória hodi hatutan ba jerasaun tuir mai. Nune’e, ami mós simu turista barak hosi internasionál no nasionál inklui estudante,” Diretór Nasionál Unidade Edukativa no Kultura, Alvaro Rosário Vasconcelos, hateten ba AgênciaTatoli, iha ninia knaar fatin, Caicoli, tersa ne’e.

Nia konta tuir, foufoun ne’e estudante laiha interese atu mai vizita muzeu, maibé tanba profesór ne’ebé hanorin matéria istória iha eskola sira lori estudante sira mai vizita entaun sira bele hatene no koñese istória luta ba libertasaun.

“Kona-ba estudante, primeiru harii AMRT la fó importánsia maibé ikus liu ne’ebé eskola hahú introdús AMRT ba estudante mak eskola CAFE, eskola portugés, ne’ebé sempre lori estudante mai vizita espozisaun hodi koñese istória Timor-Leste. Primeiru mai vizita mak Eskola KAFE, depois eskola Nicolau Lobato, Eskola São Paulo, no eskola sira seluk,” nia akresenta.

Notísia relevante : F-FDTL ofisialmente entrega Gong funu nian ba AMRT, I.P

Aleinde ne’e, muzeu  hetan vizita husi reprezentante Santo Padre, Prezidente Repúblika Portugal, Sekretáriu Jerál Organizasaun Nasaun Unida, Ban Ki-Moon, inklui entidade seluk hanesan membru Governu sira iha rai li’ur.

Prosesu asesu ba AMRT mak rejistu iha balkaun, hafoin haree espozisaun iha muzeu no aplika tarifa ba turista internasionál $1, idozu sentavu 0,50, estudante sentavu 0,25 (tenke hatudu kartaun identidade eskola).

Responsável atendimentu balkaun I iha AMRT, Teófilo Alves Correia, informa, totál vizitante ba ho grupu hamutuk 2.106, hahú husi fulan-janeiru to’o marsu.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!