iklan

DEFEZA, HEADLINE

Komandu F-FDTL sei prosesa oknum ne’ebé tenta impede servisu PolTrans

Komandu F-FDTL sei prosesa oknum ne’ebé tenta impede servisu PolTrans

Vise Xefe Estadu Maiór Jeneràl FALINTIL -Forsa Defeza Timor-Leste (F-FDTL), Maijor Jeneràl Calisto dos Santos "Coliati". Imajen Tatoli/Francisco Sony.

DILI, 30 maiu 2024 (TATOLI) – Vise Xefe Estadu Maiór Jenerál FALINTIL-Forsa Defeza Timor-Leste (F-FDTL), Calisto dos Santos “Coli Coliati” lamenta ho atitude membru F-FDTL ne’ebé mak uza sivil hodi tenta impede servisu Polísia Tránzitu nian no komandu sei halo prosesu hasoru membru ne’e.

Coliati afirma kestaun ne’e hodi reponde ba membru F-FDTL ne’ebé tenta impede servisu Polísia Tránzitu nian.

Kazu ne’e akontese iha kuarta (29/5) horseik dader iha área Audian, Suku Caicoli, Postu Administrativu Vera Cruz, Munisípiu Dili. Tanba polísia tránzitu pasa revista ba movimentu karreta ho motor iha Audian, derepente membru F-FDTL hatais sivíl ho motorizada liuhosi Audian no polísia ida hapara no husu dokumentu komprovativu ba motor maibé dokumentu la kompletu no polísia aplika billete infrasaun hodi orienta nia atu ba selu iha banku hafoin foti fali motor.

Maibé na’in ba motor lakohi koopera no hateten katak ‘’ha’u membru F-FDTL’’ no telephone direta ba nia kolega sira hosi Unidade Polísia Militár no Polísia Minitál to’o kedan iha fatin no mosu dezentendimentu entre polísia.

“Kuandu nia ema militár maibé momentu nia la uza farda mak autoridade seguransa pasa revista ba nia motór ka atu aplika infrasaun ba nia tanba nia lori motór komete infrasaun, mak nia koalia ha’u militár ne’e kontra regra militár nia. Tanba nudar militár iha ne’ebé de’it nia tenke hanesan militár”, Coliati dehan ba jornalista sira hafoin vizita ba iha Ró Qi Jiguang iha Portu Dili, kinta ohin.

“Militár laos de’it iha kompañia laran, laos iha baze laran, maibé militár tenke hatur nia postura nudar militár iha ne’ebé de’it no nia tenke sai ezempu ba sosiedade ida-ne’e”, nia salienta.

Nia akresenta, Komandu F-FDTL sei aplika sasaun ba membru militár ne’ebé mak iha liur maibé nia la kumpre orden no regra.

“Portantu atitude ba membru militár ne’ebé iha li’ur la kumpre orden, la kumpre regra, ne’e sei aplika sansaun militar”, nia afirma.

“Ha’u labele halo komentáriu tanba ha’u seidauk iha informasaun, ida-ne’e iha kadeia komandu, sira sei hato’o relatóriu, depois relatóriu ne’e to’o ona komandu mak, ami bele halo komentáriu”, nia konklui.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!