Konfrontu iha Baucau estraga komunidade nia uma no ema na’in-rua kanek

BAUCAU, 30 maiu 2024 (TATOLI) – Konfruntu ne’ebé akontese iha área Vila Antiga to’o Teulale, munísipiu Baucau Vila estraga komunidade nia uma no ema na’in-rua hetan kanek.

Kazu referida akontese hahú iha oras 06:07 kalan, loron-kuarta 29 maiu bainhira grupu joven sira komboiu akompaña mate-isin diresaun husi Dili mai Baucau.

Bainhira to’o iha área Nagardjo mosu provokasaun no kontinua iha Vila Antiga hahú tuda malu to’o área Teulale diresaun ba Diwake, ne’ebé deskonfia envolve membru organizasaun arte-marsiál  balun no oras ne’e parte polísia halo hela prosesu investigasaun.

“Sira atu lori mate-isin ba Diwake mosu provokasaun balun hodi akontese tuda malu hodi rezulta situasaun sai problema, alvu ba uma nune’e rezulta uma komunidade rahun,” Komandante PNTL Munisípiu Baucau, Superintendente Xefe, Antoninho Mauluta hateten iha Vila Nova, kinta ne’e.

Mauluta esplika, bainhira mate-isin transfere husi Dili, parte seguransa inklui líder organizasaun arte-marsiál laiha informasaun maibé komboiu iha ona postu Vemasse mak foin iha informasaun nune’e PNTL halo asegura maibé ikus mai mosu konfrontu tanba iha provokasaun.

Maske PNTL esforsu halo atuasaun ho maneira tiru gás maibé joven hirak-ne’e kontinua tuda malu nune’e parte PNTL obrigadu tenke asegura hodi loke dalan no akompaña konvoi to’o Diwake.

“Joven ida mak kanek inklui ita-nia membru Xefe Ekipa Task Force na’in-ida mak kanek iha ulun no hetan ona tratamentu iha ospitál,” Superintendente Xefe Antoninho Mauluta akresenta.

Alende ne’e, tanba ezijénsia husi família mate-isin tenke lori ba rai moris fatin, nune’e PNTL deside laiha konvoi maibé úniku ambulánsia ho família akompaña husi seguransa mak kontinua lori mate-isin ba Saelari, postu administrativu Laga hodi halo prosesu kulturál antes serimónia fúnebre.

Tuir informasaun ne’ebé Agência TATOLI rekolla iha terrenu nota katak, husi konfrontu referida rezulta uma komunidade hamutuk sia mak hetan estragus no vitíma na’in-haat mak hetan kanek.

Enkuantu, rezultadu provizóriu identifikasaun husi PNTL Baucau, kazu referida seidauk hatene totál uma komunidade ne’ebé hetan estragus no vitíma kanek na’in-rua hanesan membru (PNTL) husi seksaun Task Force komandu munisípiu Baucau no juven ida.

Jornalista   : Natalino Belo 

Editór         : Evaristo Soares Martins