iklan

DEFEZA, HEADLINE

Prezensa Forsa Navál Xina símbolu hametin relasaun bilaterál ho Timor-Leste

Prezensa Forsa Navál Xina símbolu hametin relasaun bilaterál ho Timor-Leste

DILI, 30 maiu 2024 (TATOLI) – Ró forsa hosi Komponente Navál Xina ho naran “Qi Jiguang” vizita dala lima mai Timor-Leste hodi hametin liután kooperasaun bilaterál entre nasaun rua.

Ró Navál Xina ne’e mai Timor-Leste iha kinta (30/5) ohin no atraka iha Portu Dili, iha oras tuku 9:00 dader.

Forsa Navál Xina tún hosi ró no simu hosi Vise Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Calisto dos Santos “Coli Coliati” no akompaña hosi Embaixadora Xina ba Timor-Leste Wang Wenli, direjente hosi Ministériu Defeza no Forsa Komponente Navál F-FDTL.

Ró forsa Navál Xina lori de’it militár Komponente Navál Xina nian, ne’ebé atraa hahú 30 jullu to’o 03 juñu.

Hafoin vizita tiha Ró Qi Jiguang, Coliati hateten, prezensa ró marina Xina mai Timor-Leste nudar tradisaun militár marina iha mundu atu hametin kooperasaun.

“Vizita ida ne’ebé ita-nia parseiru sira hosi Xina mai vizita Timor-Leste ne’e parte ida hosi tradisaun ezérsitu marina ninian, sira iha ne’e hahú ohin to’o 3 juñu. Ida-ne’e sinál atu hametin ita-nia kooperasaun entre Xina ho Timor-Leste”, Coliati hateten ba jornalista sira hafoin vizita ba iha Ró Qi Jiguang iha Portu Dili, kinta, ohin.

Majór Jenerál ne’e hateten, ró forsa marina iha Timor-Leste, forsa marina Xina sei halo vizita estudu akadémiku ba Institutu Defeza Nasionál (IDN), sira sei ba vizita Komponenete Naval F-FDTL iha Hera no sei halo mós jogu amizade entre forsa Navál Xina ho Forsa Navál F-FDTL.

“Laiha atividade espesífiku, atividade mak ne’e. laiha formasaun, ne’e vizita ne’ebé sira halo  mai timór de’it , sira halo vizita ba portu., sira hanesan Indonézia no iha dalan ne’ebé sira liu”, nia adianta.

Tuir ajenda ne’ebé iha, komandante ne’ebé lori Ró Navál “Qi Jiguang” sei halo vizita ba entidade nivél altu nasaun nian, Ministru Defeza, Xefe Estadu Maiór Jenerál F-FDTL, Komandante Komponente Navál F-FDTL, IDN, halo vizita ba Estudante no Profesór sira.

Jornalista: Natalino Costa

Editór : Zezito Silva

iklan
iklan

Leave a Reply

iklan
error: Content is protected !!