Telekomsel apoia ekipamentu router ínternet ba eskola sekundáriu haat iha Viqueque
VIQUEQUE, 30 maiu 2024 (TATOLI)-Empreza Telekomunikasaun Telekomsel iha Timor Leste ho inisiativa apoia ekipamentu teknólojia router internet ba eskola sekundáriu haat iha postu Viqueque Vila, munisípiu Viqueque hodi fasilita estudante no profesór asesu ba intoperadór hodi fasilita profesór no edtudante konsulta ka peskiza matéria sira.
iha distribuisaun ne’e, CEO Telekomsel iha Timor Leste, Benedictus Ardiy Priyo, hateten, apoia ki’ik ne’ebé Telekomsel ba eskola sekundáriu sira-ne’e ekipamentu router internet ne’e hodi ajuda estudante no profesor sira.
“Ami telekomsel oferese router ínternet ba eskola sira hodi tau iha edifísiu eskola atu apoia profesór sira uza mensajén matéria ba estudante sira ho lalais no asesu ho di’ak. Ami fó apoiu gratuita ba eskola sekundáriu sira”, Benedictus Ardiy Priyo, hateten bainhira halo distribuisaun ekipamentu router ba diretór eskola haat, iha Plaza Telkomsel, Viqueque Vila, ohin.
Nia dehan, apoia internet ne’ebé telekomsel fó bele inspira no motiva profesór sira iha eskola hodi asesu ba rede internet ho velosidade lalais.
“Ha’u espera ho apoiu ida-ne’e bele tulun profesór sira sai badinas liután hanorin estudante sira. Tanba profesór sira-ne’e mak sai hanesan veteranu ida ba matenek sira”, nia akresenta.
Iha fatin hanesan, Diretór Ensinu Sekundáriu Jerál (ESJ) Kalixa Viqueque Vila, Rozito Soares, agradese ba Telekomsel ne’ebé apoia ona rede ínternet ba eskola sekundáriu sira tanba ajuda profesór sira asesu ìnternet.
“Ami husu agradese ba telkomsel ne’ebé tulun ona rede internet ba ami, atu ami bele tau iha ami-nia eskola hosi asesu internet hodi konsulta matéria sira”, nia subliña.
Ho apoia ne’e nia dehan, fasilita profesór no estudante sira tanba antes ne’e programa Ministériu Edukasaun (ME) oferese liña internet ba eskola, maibé agora programa ida-ne’e laiha.
Ekipamentu ne’ebé eskola simu kompostu husi router no sim card ida kapasidade utilizasaun ema na’in-50 no eskola sei halo rotasaun hodi estudante no profesór sira bele asesu.
“Ami-nia ekipamentu ne’ebé simu aban (sesta) mak ami hahú uza internet. Agora ami seidauk utiliza”, nia afirma.
Eskola sekunáriu sira-ne’ebé simu ekipamentu internet maka hanesan Sekundáriu 4 Setembru, Sekundáriu Teniku Vokasionál Cristal Viqueque no Senkundáriu Katólika Santo Estevão.
Jornalista : Vitorino Lopes da Costa
Editór : Florencio Miranda Ximenes
