COVALIMA, HEADLINE

Ajénsia Munisipál no Planeamentu Covalima aprezenta ezbosu PAA 2025 ba kargu xefia sira

Ajénsia Munisipál no Planeamentu Covalima aprezenta ezbosu PAA 2025 ba kargu xefia sira

Prezidente Autoridade munisípiu (PAM) Covalima, Miguel Armada Cardoso. Foto/Celestina Teles.

COVALIMA, 31 Maiu (TATOLI) – Autoridade Covalima liuhusi Ajénsia Munisipál no Planeamentu aprezenta, iha reuniaun konsellu koordenasaun (KKM), ezbosu Planu Asaun Anuál (PAA) 2025, ba diretór munisipál, diretór delegasaun territoriál, administradór postu hitu no xefe suku sira.

Diretór Ajénsia Munisipál no Planeamentu, Afonso Nogueira Nahak, dehan ezbosu PAA 2025 ba munisípiu Covalima nia prosesu to’o ona iha Ministériu Finansa ne’ebé fó prióridade ba programa 13, sub-programa 33 ho nia atividade 85.

“Ezbosu planu asaun anuál 2025, ita-nia indikadór mak presiza hatudu nia rezultadu iha ezekusaun orsamentu 2024, tanba ministériu hato’o ona katak iha trimestre daruak ita-nia ezekuzasaun orsamentu 2024 tenke atinje ona porsentu 50. Maibé, daudaun ne’e nia ezekusaun foin porsentu 25,8”, Afonso Nahak aprezenta iha ámbitu reuniaun, ohin.

Iha tinan oin, autoridade Covalima propoin $16.568.37,80, husi montante ne’e aloka ba saláriu  no vensimentu $4.297.266,50, bens no servisu $2.655.186,52, kapitál menór $3.518.059,99, kapitál dezenvolvimentu $1.929.169,04 no transferénsia públika 4.178.695,75.

Aloka ba Programa Estrada no Ponte $1.028.521,99, Dezenvolvimentu Rurál no Urbanu $1.028.521,99, Seguransa Nasionál $4.196.983,04, Asesu Justisa $287.688, Funsionamentu no Dezenvolvimentu Institusionál $117.237, Aumentu Sustentavel Produtividade no Produsaun $3.958.969, Água no Saneamentu $2.991.022, Saúde $531.911, Edukasaun pré-eskolár $511.811,74, Ensinu Báziku $2.052.652,01, Ensinu Rekorrente $2.716, Inkluzaun Sosiál $295.452 no Turizmu $196.711,02.

Prezidente Autoridade munisípiu Covalima, Miguel Armada Cardoso, rekomenda ba Ajénsia Munisipál no Planeamentu atu aloka orsamentu tuir nia kategória Orsamentu Jerál Estadu (OJE) 2025.

“Ha’u fiar ita-boot sira elabora ezbosu planu asaun anuál no aloka orsamentu tuir kategória orsamentu jerál estadu”, nia fó hanoin.

Relembra katak , Governu Sentrál aloka OJE 2024 ba Covalima hamutuk $7.256.651, ne’ebé prevee ba saláriu no vensimentu $2.336.743, bens no servisu $846.885, tranferénsia públika $2.556.011, kapitál menór $166.820, no kapitál dezenvolvimentu $1.350.192.

Jornalista: Celestina Teles

Editora:Maria Auxiliadora

iklan
iklan

Leave a Reply

iklan
error: Content is protected !!