DILI, 31 maiu 2024 (TATOLI)–Prezidente Komisaun Téknika Superior iha Conferensia Episkopal (CET), Pe, Graciano Santos Barros, hateten CET entrega ona relatóriu subvensaun ba igreja katólika iha 2023 ba Governu.
Saserdote ne’e hateten, CET implemente subvensaun ho karáter tolu mak hanesan edukativu, sosiál no governasaun ekleziastiku, ho totál osan subvensaun iha tinan 2023 hamutuk millaun $15.
“Relatóriu kompletu ami entrega hotu ona, ami hakarak mensiona de’it katak projetu ne’ebé ita halo iha fatin-fatin sira-ne’e iha parte edukasaun mak projetu 21, karáter sosiál iha 19 no Governu eklezial iha projetu 13,” Prezidente Komisaun Téknika Superior iha Conferensia Episkopal (CET) ne’e hateten ba jornalista sira, iha Palásiu Governu, sesta ne’e.
Projetu sira-ne’e realiza iha CET rasik no iha dioseze Baucau, Dili no Maliana hamutuk projetu 53 ne’ebé termina tiha ona.
Nia hateten, iha mós projetu plurianuál ne’ebé seidauk hato’o relatóriu maibé projetu sira-ne’e kontrola husi gabinete sosiedade sivil, la’ós kontrola de’it maibé iha apoiu tékniku balun ne’ebé presiza.
“Kuandu imi liu iha fatin sira hanesan igreja, eskola no uma ba ema ki’ak sira hanesan orfonatu, ami uza barak liu mai hosi subvensaun Governu nian, tan ne’e ami obrigasaun hato’o relatóriu no konvida mídia sira hodi hato’o,” nia dehan.
Iha totál benefisiáriu direta hamutuk 139.935 ba iha subvensaun públika hosi Governu ba iha CET, sein konta benefisiariu indireta hanesan sarani sira utiliza igreja ba misa no eskola.
Iha fatin hanesan, Kordenadór Gabinete Servisu Apoiu Sosiedade Sivil no Auditoria Sosiál (SASCAS), Joaquim da Costa Freitas, hateten CET iha obrigasaun tanba iha kontratu subvensaun públiku, CET hanesan responsabiliza ba valór ne’ebé atribui ba sira no tinan-tinan sira aprezenta relatóriu ba iha Governu.
“Ofisiálmente ami simu relatóriu hosi CET, ne’e hatudu katak CET iha responsabilidade ba utilizasaun fundu ne’ebé ita atribui ba sira no ami hakarak públika, tanba dalabarak ema sempre hateten CET halo ezekusaun orsamentu laiha relatóriu,” Kordenadór SASCAS, Joaquim da Costa Freitas, hateten ba jornalista sira.
Projetu ne’ebé mensiona iha relatóriu ne’e hamutuk 53, balun Governu vizita no sei kontinua vizita hodi mantein kategoria sira-ne’ebé atribui ba iha CET iha kada dioseze kona-ba obra sira implementa.
Governu sente kontente bele simu relatóriu hosi CET ba esforsu tomak ne’ebé sira halo no realiza duni hodi entrega relatóriu.
“Relatóriu refleta ba iha ezekusaun (projetu). Iha relatóriu narativu no finanseiru ba gastu no relatóriu ne’e haree ba iha gastu ne’e kompatível ho narativu. CET aprezenta relatóriu obra feitu ho valór hira ho evidénsia fíziku. Iha mós ba iha edukasaun tuir gastu ho resivu. Obra fízika hamutuk ho enjeiñeiru sira, ba ami hare fizikamente iha terrenu iha kualidade,” nia dehan.
Notísia Relevante: Kada tinan, Governu fó subvensaun millaun $15 ba Igreja Katólika
Jornalista : Jesuína Xavier
Editór : Cancio Ximenes
