HEADLINE, POLÍTIKA

Estadu TL konvida SekJer  ONU mai partisipa komemorasaun tinan 25 konsulta populár  

Estadu TL konvida SekJer  ONU mai partisipa komemorasaun tinan 25 konsulta populár  

Imajen/Media GPM

DILI, 31 maiu 2024 (TATOLI)- Primeiru Ministru (PM), Kay Rala Xanana Gusmão,  akompaña hosi Ministru Negósiu Estranjeiru no Kooperasaun (MNEK), Bendito dos Santos Freitas, hala’o enkontru ho Sekretáriu Jerál Organizasaun Nasaun Unidas (ONU), António Guterres,  hodi entrega karta konvite hosi Prezidente Repúblika (PR), José Ramos-Horta, atu mai partisipa komemorasaun tinan 25 Konsulta Populár iha 30 Agostu 2024.

Konvite ho karráter espesiál husi Xefe Estadu, Ramos-Horta no povu Timor-Leste nian ne’e, entrega ofisialmente hosi Xefe Governu Xanana Gusmão ba Sekretáriu Jerál ONU, António Guterres, hafoin partisipa abertura IV konferénsia internasionál kona-bá Estadu Illa Kiik Dezenvolvidu (SIDS) sira ho tema “Hamutuk Trasa Planu bá Prosperiedade Reziliente,” iha São João, Antígua no Barbuda, foin lalais ne’e.

Primeiru-Ministru hateten, konvite ne’e espesiál tebes ba Sekretáriu Jerál ONU, António Guterres hosi povu Timor-Leste.

Alende ne’e, konvite espesiál ne’e mós sei hato’o ba bainaka importante sira seluk hanesan Xefe Estadu no Xefe Governu nasaun balun, ne’ebé sei konvida atu partisipa iha festa komemorasaun konsulta populár husi 20 to’o 30 Agostu 2024, hodi fó lembra kona-bá istória luta Timor-Leste nian ba independénsia.

SekJer ONU sente onradu

Sekretáriu Jerál ONU, António Guterres sente ondradu bele hasoru hikas, Kay Rala Xanana Gusmão, hanesan líder reziténsia Timor-Leste nian ho povu Timor-Leste ne’ebé sai nu’udár belun di’ak bá líder ONU ne’e.

“Benvindo grande amigu, Kay Rala Xanana Gusmão. Orgullu tebes bele hasoru-malu ho ita iha fatin ida ne’e. Agradese bá ita-nia prezensa iha ekontru ida-ne’e,” António Guterres hateten bainhira simu karta hosi Xanana Gusmão no kaer-liman, haku’ak-malu nu’udár belun di’ak.

António Guterres agradese ba konvite ne’e, maibé líder ONU ne’e seidauk bele fó respota kona-bá ninia partisipasaun, tanba sei haree ba servisu ONU nian ne’ebé daudaun ne’e foka ba pás no dame iha nasaun hotu-hotu.

António Guterres durante ne’e iha relasaun di’ak ho povu no lider sira Timor-Leste nian to’o assume kargu nu’udár Sekretáriu-Jerál Organizasaun Nasoins Unidas (ONU), kontinua hakle’an kooperasaun ho Timor-Leste, estabelese parseiru oin-oin ho nasaun membru hirak ne’ebé halo parte iha sistema globál ONU hodi ajuda hadi’a no dezenvolve Timor-Leste iha seitór oioin.

António Guterres assume kargu Primeiru-Ministru Portugál hosi tinan 1995 to’o tinan 2022, no hala’o knaar hanesan Altu Komisáriu ONU nian bá Refujiadus hosi tinan 2005 to’o tinan 2015.

Hosi loron 1 fulan-janeiru tinan 2017 simu knaar hanesan Sekretáriu-Jerál ONU. Eleitu hikas ho lian ida de’it hosi Estadu-Membru ONU nian hamutuk 193, bá mandatu foun iha 1 janeiru 2022 to’o agora.

TATOLI

iklan
iklan

Leave a Reply

iklan
error: Content is protected !!