COVALIMA, 31 Maiu 2024 (TATOLI) – Autoridade Protesaun Sivíl (APC, sigla portugés) Covalima rejista família 123 afeta ba inundasaun, ne’ebé kauza husi udan-boot ne’ebé akontese dezde iha loron 30 Maiu.
Komandante APC Covalima, Inspetór Xefe, Flávio dos Santos Mendes, hateten Autoridade Protesaun Sivíl ho apoiu husi servisu munisipál ba dezastre naturál no parseiru Cruz Vermella Timor-Leste (CVTL, sigla portugés) halo ona identifikasaun no rekolla dadus provizóriu ba vítima dezastre naturál.
“Daudaun ne’e, ita identifika fatin akontesimentu ba komunidade afetada ba inundasaun mai husi postu Zumalai, Maucatar, Tilomar no Suai”, Flávio Mendes relata dadus ne’e iha Santa Rosa.
Iha Zumalai, família afetada hamutuk uma-kain 103, ne’ebé mai husi suku Lour, aldeia Salasa hitu, suku Tashilin, aldeia Galitas 18 no aldeia Basana 78.
Aleinde ne’e, iha postu Maucatar, husi suku Belecasac, aldeia Dais iha uma-kain ida. Iha Tilomar, iha suku Maudemo, aldeia Sadahur haat, aldeia Koitau rua no postu Suai, iha suku Debos, aldeia Lakonak Babo tolu.
“Dezastre naturál danifika komunidade nia ai-han, uma, tanba bee tama halo uma laran tahu, nune’e ekipa Bombeiru fase komunidade nia uma ne’ebé nakonu ho tahu, maibé fatin balun seidauk konsege fase tanba la asesu ba estrada hanesan iha Zumalai”, adianta.
Vítima afetada iha aldeia Sadahur, suku Maudemo, postu Tilomar, Geraldo Afonso, dehan nia la konsege salva sasán uma laran, tanba mota lori hotu.
“Mota tama uma tuku lima madrugada, entaun ha’u salva uluk labarik, nune’e ami la konsege salva sasán uma laran, ai-han, labarik nia farda eskola, dokumentu importante no seluk tan”, relata.
Prezidente Autoridade munisípiu Covalima, Miguel Armada Cardoso, tuun bá terrenu hodi halo observaun no fó kedas orientasaun ba autoridade postu no ba servisu munisipál obra públika Covalima hodi normaliza estrada no mota ho emerjénsia.
“Dezastre naturál afeta ba komunidade iha postu Zumalai no Tilomar no seluk tan hodi danifika estrada protokolu, ponte no auto-estrada”, nia haktuir.
PAM aprezenta kestaun dezastre naturál ba Vise-Primeiru-Ministru Assanami
Prezidente Autoridade Munisípiu (PAM) Covalima, Miguel Armada Cardoso, aprezenta problema dezastre naturál iha Covalima ba Vise-Primeiru-Ministru no Ministru Koordenadór Asuntu Sosiál, Dezenvolvimentu Rurál no Abitasaun Komunitária, Mariano Assanami Sabino.
Miguel Armada Cardoso dehan udan boot ne’ebé akontese dezde loron 30 halo autoridade sira labele tuur hamatek, tanba kauza dezaste naturál ka inundasaun, bee tama populasaun nia uma, danifika estrada, ponte no auto-estrada iha Covalima.
Ho akontesimentu ne’e, autoridade fó kedan orientasaun ba Servisu Munisipál Obra Públika (SMOP) atu koodena ho Institutu Jestaun Ekipamentu no Apoiu ba Dezenvolvimentu Infraestrutura, Institutu Públiku (IGE, I.P) hodi mobiliza ekipamentu pezadu atu halo normalizasaun ba estrada, nune’e bele fasilita movimentu transporte públiku.
Aleinde ne’e, orienta mós komunidade halo limpeza hodi hasai fo’er sira ne’ebé taka dalan no orienta ba ekipa bombeiru tesi ai sira taka dalan iha estrada liga ba fronteira Mota-Masin.
Prezensa Vise-Primeiru-Ministru Mariano Assanami hanesan vizita dahuluk bá munisípiu Covalima hodi koordena atu reforsa desentralizasaun.
Jornalista: Celestina Teles
Editora: Maria Auxiliadora
