Top

Komisaun C rekomenda MAE halo avaliasaun insentivu ba ekipa jestaun suku

Uma Fukun Parlamentu Nasionál. Imajen Egas Cristovão

DILI, 31 maiu 2024 (TATOLI)—Komisaun C ne’ebé trata asuntu Finansa Públika  iha Parlamentu Nasionál (PN)  rekomenda ba Ministériu Administrasaun Estatál  (MAE) atu halo avaliasaun ba serbisu ekipa jestaun suku nian kona-ba sira-nia insentivu.

“Rekomenda ba Ministériu Administrasaun Estatál (MAE) presiza halo avaliasaun ba serbisu ekipa jestaun suku nian kona-ba sira-nia insetivu,” haktuir relatóriu fiskalizasaun komisaun C, ne’ebé Agência Tatoli asesu, sesta ne’e.

Iha loron 08-10 maiu tinan 2024 ne’e, komisaun C liderada husi Prezidente Komisaun, Cedelísia Faria dos Santos, akompañadu husi deputadu membru komisaun hala’o fiskalizasaun ba iha munisípiu Ainaro ho objetivu hodi rona kona-ba ezekusaun Orsamentu Jerál Estadu (OJE) ne’ebé aloka ba iha munisípiu no ba terrenu hodi haree kona-ba projetu ne’ebé realiza ona husi orsamentu Estadu nian tuir programa autoridade sira munisípiu Ainaro ne’ebé aprovadu ona iha Parlamentu Nasionál.

Enkuantu, iha vizita fiskalizasaun iha terrenu ne’e iha autoridade lokál husi suku Manutasi, munisípiu Ainaro aprezenta preokupasaun insentivu ba ekipa jestaun suku no.

Husi preokupasaun ne’e, komisaun hato’o rekomendasaun husi autoridade xefe suku Manutasi nian hodi sujere ba Governu bele halo revizaun ba matadalan PNDS kona-ba apoiu insetivu ba ekipa jestaun suku nian, tanba insentivu ne’e la responde ba sira-nia nesesidade serbisu nian.

Hanesan komisaun planeamentu akuntabilidade ema na’in-rua (2) mak prezidente no sekretária sira-nia insentivu fulan tolu (3) mak foin simu $36.

Ekipa implemetasaun programa ema na’in-tolu (3) mak prezidente no tezoreiru na’in-rua (2) fulan tolu (3) mak simu $56.

Fasilitadór suku ema na’in-rua (2) mak feto na’in-ida (1) no mane na’in-ida (1) ne’ebé fulan tolu 93) mak simu $25.

Ekipa jestaun suku nia orsamentu mai husi orsamentu PNDS ne’ebé aloka ba iha Uma Kbiit Laek (UKL), husi orsamentu ne’e mak 50% ba operasionál nian, ne’ebé ekipa jestaun suku simu nia insentivu bainhira UKL ramata tuir matadalan PNDS nian ne’ebé la’o kuaze tinan 10 ona.

Entretantu, relatóriu fiskalizasaun komisaun nian ne’e iha reuniaun plenária iha semana ne’e Prezidente Parlamentu Nasionál halo ona distribuisaun no hato’o kópia ba Governu hodi ministériu tutela tau atensaun.

Jornalista : Nelson de Sousa

Editór        : Cancio Ximenes

Publisidade

Leave a Reply

Latest Post

error: Content is protected !!