iklan

AINARO, POLÍTIKA

MKI presiza kria kondisaun ba merkadu Ainaro

MKI presiza kria kondisaun ba merkadu Ainaro

Merkadu Munisípiu Ainaro. Imajen/Egas Cristovao

DILI, 31 maiu 2024 (TATOLI)—Komisaun C ne’ebé trata asuntu Finansa Públika iha Parlamentu Nasionál (PN) rekomenda ba Ministériu Komérsiu no Indústria (MKI) atu kria kondisaun ba merkadu munisípiu Ainaro.

“Rekomenda ba Ministériu Komérsiu no Indústria atu kria kondisaun merkadu ne’ebé di’ak ho dignu, hodi nune’e negosiante sira hala’o sira-nia atividade ne’ebé di’ak hodi kontribui ba reseita iha munisípiu,” refere relatóriu fiskalizasaun komisaun C nian ne’ebé Agência Tatoli asesu, sesta ne’e.

Komisaun C liderada husi Prezidente Komisaun, Cedelísia Faria dos Santos, akompañadu husi deputadu membru komisaun, iha loron 08 to’o 10 maiu 2024 ne’e, hala’o fiskalizasaun ba iha munisípiu Ainaro ho objetivu hodi rona kona-ba ezekusaun Orsamentu Jerál Estadu (OJE) ne’ebé aloka ba iha munisípiu no ba terrenu hodi haree kona-ba projetu ne’ebé realiza ona husi orsamentu Estadu nian tuir programa autoridade sira munisípiu Ainaro ne’ebé aprovadu ona iha Parlamentu Nasionál.

Iha vizita fiskalizasaun iha terrenu, liuliu ba iha merkadu munisípiu Ainaro ne’e, deputadu komisaun C haree diretamente kondisaun merkadu ne’ebé negosiante sira hala’o sira-nia atividade, maibé kondisaun merkadu ein-jerál ladi’ak no estrada mós ladi’ak, maiória negosiante sira dada sira-nia terpal, laiha bee-moos no sintina úbliku mak dalaruma loron ida sorte bele hetan rendimentu $15 no boot-liu $20.

Iha vizita ne’e, negosiante sira husu mak hadia dalan no kria kondisaun merkadu ne’ebé di’ak ho dignu, hodi atrai ema bele sosa sira-nia sasán.

Iha parte seluk, komisaun rekomenda ba Ministériu Obra Públika (MOP) atu hadi’a estrada iha munisípiu Ainaro Vila laran, ne’ebé ligasaun ba iha merkadu no edifísiu seluk hodi nune’e komunidade bele asesu dalan ho di’ak.

Jornalista : Nelson de Sousa

Editór        : Cancio Ximenes  

iklan
iklan

Leave a Reply

iklan
error: Content is protected !!