EDUKASAUN, HEADLINE

UNDIL fó formasaun ba dosente hodi eleva kualidade edukasaun

UNDIL fó formasaun ba dosente hodi eleva kualidade edukasaun

Reitór UNDIL, José Agostinho da Costa Belo. Imajen Tatoli/Francisco Sony

DILI, 31 maiu 2024 (TATOLI)Universidade Dili (UNDIL), sesta ne’e, fó formasaun ba dosente sira hodi eleva kualidade edukasaun iha Timor-Leste.

“Iha orsamentu ne’ebá dehan kedas, oinsá mak eleva kualidade edukasaun no promove estudante no dosente sira. Tanba ne’e mak ita hahú halo workshop internasionál sira ba estudante sira hodi hahú promove lian portugés, tanba apoiu husi Governu, liu-liu Primeiru Ministru, Kay Rala Xanana Gusmão nia polítika, apoiu portugés sai lian ensinu iha eskola, entaun universidade iha responsabilidade no oinsá promove lian portugés hodi eleva kualidade edukasaun iha ita-nia rai,” Reitór UNDIL, José Agostinho da Costa Belo, informa iha salaun CNE, Caicoli.

Nia esplika, iha estudante barak inklui dosente sira ne’ebé ladún ko’alia lian portugés, tanba ne’e mak fó formasaun ba sira atubele domina lian portugés hodi bele kompete mós iha nível saida de’it. Daudaun ne’e UNDIL rasik haruka profesór sira kontinua estudu iha rai-li’ur.

“Ita hahú ho formasaun, nune’e bele iha kualidade di’ak, tanba formasaun ne’e mak bele fasilita dosente sira, nune’e ita dudu sira tuir formasaun hodi sira abitua ona, agora iha modelu barak oinsá bele promove lian portugés, tanba ne’e mak daudaun ne’e UNDIL haruka ona profesór 15 ba kontinua doutoramentu no mestradu iha Portugal no Brazíl,” nia akresenta.

Buat hotu hahú ona maski la’o neineik nune’e iha futuru bele eleva kualidade edukasaun sira iha área oin-oin hanesan mós iha rai seluk.

Notísia relevante : Estudante Universidade Nusa Cendana Kupang ho UNDIL hala’o servisu sosiál iha PLBN Wini

Embaixadora Portugal iha Timor-Leste, Maria Manuela Freitas Barros, hateten, sira nafatin fó esperansa ba timoroan hotu, liu-liu estudante sira hodi bele ko’alia lian portugés, tanba ne’e sira sei nafatin apoiu timoroan ba formasaun iha nível sientífiku sira.

“Tanba lian Portugés mós nu’udar lian ofisiál Timor-Leate nian, nune’e ami nafatin fó esperansa ba estudante sira atubele ko’alia lian portugés di’ak iha futuru no bele hametin lian portugés,” nia akresenta.

Estudante UNDIL, Joaquim Belo, konsidera atu eleva kualidade edukasaun Governu presiza fó atensaun maka’as ba iha ensinu superiór sira, liu-liu iha área língua sira, nune’e bele kompete iha nasaun seluk.

“Maski ita hatene buat barak maibé ita la hatene lian, ita nafatin lakon ba kompetisaun sira, tanba atu tuir kompetisaun sientífiku ne’e presiza hatene língua nune’e ita bele define saida mak ita hatene ne’e ba ema seluk,” nia dehan.

Ministru Ensinu Superior Siénsia no Kultura (MESSK), José Honório, informa, osan subvensaun públiku ne’e povu nian nune’e husu ba kada ensinu superiór sira ne’ebé hetan ona tenke iha responsabilidade atu ezekuta ho didi’ak.

“Subvensaun públika ne’e hodi fasilita sira-nia atividade iha universidade atu eleva kualidade edukasaun iha Timor-Leste. Ita fó apoiu signifika sira mós tenke fó buat ruma ba ita, sira fó buat ruma mak kualidade,” nia esplika.

Iha apoiu subvensaun públika ne’e, iha pontu importante balun ne’ebé sita oinsá bele hasa’e kualidade liu-liu iha lian portugés nomós fó formasaun ba dosente sira, liu-liu ko’alia kona-ba pedagójika, signifika métodu ida-ne’ebé dosente sira la’o tuir hodi hanorin estudante sira ho di’ak nune’e estudante sira bele kompreende saida mak dosente sira oferese.

“Iha akordu sira ne’e mós iha pontu importante balun ne’ebé mak ensinu superiór presiza kumpre, liu-liu fó formasaun ba profesór sira ho lian ofisiál nune’e sira hanorin estudante ho koñesimentu ne’ebé di’ak no estudante sira mós bele akapta hodi bele kompete iha atividade sientífiku sira. Tanba kualidade edukasaun ne’e importante,” nia dehan.

Jornalista     : Osória Marques

Editora          : Julia Chatarina

iklan
iklan

Leave a Reply

iklan
error: Content is protected !!