Veteranu Karlele konklui konstrusaun uma iha Baucau
BAUCAU, 31 maiu 2024 (TATOLI) – Veteranu kombatente libertasaun lasionál, Tomé Lemos ‘Ilibui Karlele’ konklui ona konstrusaun uma ne’ebé fundu apoia hosi governu liuhusi Ministériu Asuntu Kombatete Libertasaun Nasionál (MAKLN).
Uma referida konklui ho durasaun serbisu fulan-tolu lokaliza iha área Vila Nova, suku Tirilolo sai rezidénsia privadu ba Tomé Lemos ‘Ilibui Karlele’ nu’udar apoia husi estadu Timor-Leste tanba konsidera aman Karlele nia dedikasaun luta ukun rasik aan.
Sekretáriu Jerál Konsellu Munisipál Kombatete Libertasaun Nasionál (CMCLN, sigla Portugés) Baucau, Manuel ‘Alari’ da Costa Soares, esplika, polítika Governu fo apoia orsamentu hodi konstrui uma ba kombatente sira husi Grau 24 no 15 A 19 hanesan parte rekoñesementu no dignifika lutadór sira-nia moris diak, tanba kontribui ona ba luta naruk ba Timor-Leste independénsia.
“Hau agradese ba família ida-nee, ne’ebé simu apoiu nee ho responsabilidade no kumpre oráriu ne’ebé Governu fó,” Sekretáriu Jerál CMCLN Baucau hateten iha Vila Nova, Sesta ne’e.
Uma ne’ebé konstrui husi Karlele ho medida 12×11 ho totál orsamentu hamutuk rihun $40 ne’ebé kompleta kedas ho kuartu lima, sala bainaka ida, sala haan ida, dapur inklui hariis fatin.
Alari husu benefisiáriu hotu atu utiliza uma ne’ebé konstrui husi osan estadu ho responsabilidade nune’e bele seguru nafatin iha tempu naruk.
“Governu rekoñese duni sira-nia terus,” Alari akresenta.
Benefisiáriu Tome Lemos “Ilibui Karlele” agradese ba tulun husi Governu hodi konstrui uma ne’ebé dignu ba família hodi hela ba.
Veteranu ho grau 15 a 19 ne’e husu Governu atu kontinua apoia lutadór seluk ne’ebé seidauk iha uma hanesan kombatente kategória 8 A 14 liu-liu responsável kaixa, sub kaixa, kaixa jerál no estafeta sira.
“Hau-nia preokupasaun mak veteranu seluk ne’e, Governu bele apoia hodi rekoñese sira-nia luta ka lae?,” Karlele argumenta.
Tuir dadus husi CMCLN Baucau rejista totál veteranu kombatente libertasaun nasionál hamutuk na’in-24 kompostu Grau 24 na’in-11 no 15 A 19 na’in-13 ne’ebé sai benefisiáriu ba subsídiu fundu orsamentu husi Governu hodi konstrui uma iha munisípiu Baucau.
Jornalista : Natalino Belo
Editór : Evaristo Soares Martins
