HEADLINE, POLÍTIKA

Xanana agradese ba Armida Salsiah ne’ebé ajuda ona dezenvolvimentu TL  

Xanana agradese ba Armida Salsiah ne’ebé ajuda ona dezenvolvimentu TL  

Imajen/Media GPM

DILI, 31 maiu 2024 (TATOLI)- Primeiru-Ministru (PM), Kay Rala Xanana Gusmão, agradese ba Eis Ministra ba Planu Dezenvolvimentu Nasionál Repúblika Indonézia (RI), Armida Salsiah Alisjahbana ne’ebé kontribui hodi apoia ona dezenvolvimentu Timor-Leste (TL), liu-liu halo kapasitasaun ba rekursu umanu no estabelese Ajénsia Dezenvolvimentu Nasionál (ADN) iha IV Governu Konstitusionál hodi halo kontrolu ba kualidade projetu Estadu tomak.

Tuir nota ne’ebé Agência TATOLI asesu katak sentidu agradesimentu ne’e, Primeiru-Ministru hato’o hafoin reuniaun iha salaun enkontru American University of Antigua College of Medicine, iha ámbitu IV konferénsia internasionál kona-bá Estadu Illa Kiik Dezenvolvidu sira (SIDS), iha Antígua no Barbuda, foin lalais.

Hafoin enkontru, Primeiru-Ministru konsidera enkontru ne’e nakonu ho amizade tanba pessoa Armida Salsiah Alisjahbana bainhira asume kargu Ministra bá Planu Dezenvolvimentu Nasionál Repúblika Indonézia ho nia matenek ajuda TL iha ninia dezenvolvimentu institusionál.

“Ohin enkontru kortezia ho Armida Salsiah Alisjahbana. Uluk hanesan Ministra ba Planu Dezenvolvimentu Nasionál Indonézia ajuda ita iha Ministériu Obras Públika ne’ebé falta tékniku no rekursu umanu. Nune’e nia oferese tékniku hosi Indonézia mai ajuda ADN hodi kontrola obra hotu-hotu atu halo ho kualidade,” Xefe Governu ne’ebé akompaña hosi Ministru Negósiu Estranjeiru no Kooperasaun (MNEK), Bendito dos Santos Freitas ne’e hateten.

Aproveita oportunidade ida-ne’e, Xanana Gusmão husu eis membru Governu Indonézia ho nia Governu atuál atu kontinua fó apoiu bá IX Governu Konstitusionál liu-liu MOP, MPIE no ADN atu kontrola di’ak liu tán projetu Estadu ne’ebé seitór privadu sira implementa.

“Ha’u informa mós bá Armida Salsiah Alisjahbana katak, Governu Timor-Leste kontinua kontaktu Ministru Planu bá Dezenvolvimentu Nasionál Repúblika Indonézia, hodi kontinua apoia nafatin, kurije ita iha buat barak ne’ebé akontese,” Primeiru-Ministru hateten.

Iha fatin hanesan, Armida Salsiah Alisjahbana espresa sentimentu orgullu no enkoraza TL ne’ebé iha hela prosesu dezenvolvimentu hodi kontinua prepara an di’ak liu tán sai membru permanente bá Organizasaun Rejionál Association of Southeast Asian Nations (ASEAN).

“Ha’u agradese tebes tanba bele hasoru-malu ho Primeiru-Ministru Xanana Gusmão hodi diskute progressu saida mak Timor-Leste hetan ona. Ha’u espera iha tempu ruma sei vizita Timor-Leste no kontinua husu Governu Indonézia atu kontinua fó apoiu,” Armida hateten.

Iha enkontru ne’e nia rohan, Xanana Gusmão entrega tais no kafé Timor-Leste nu’udár sinál agradesimentu no amizade bá Armida Salsiah Alisjahbana atuál Secretary Economic and Social Comission for Asia and the Pacific (UNECAP).

TATOLI

iklan
iklan

Leave a Reply

iklan
error: Content is protected !!