Empata 0-0, Maubale FC fahe pontu ho FIEL FC iha kopa FFTL

DILI, 01 juñu 2024 (TATOLI)– Ekipa Maubale FC konsege fahe pontu ba malu ho adversaláriu FIEL FC bainhira empata 0-0, iha jogu kontinuasaun faze grupu kopa Federasaun Futeból Timor-Leste (FFTL) ne’ebé realza iha Estádiu Munisipál Dili, sabadu loraik ne’e.

Estádiu Munisipál Dili sai sasin ba ekipa Maubale no FIEL durante jogu minutu 90-resin. Minutu primeiru jogu hahú iha duut matak nia leten ekipa rua lansa kedan kontra no atake ba malu ho bola  tuir tékniku no abilidade ekipa idaidak nian nune’e bele buka se mak hatama golu.

FIEL lansa atake ne’ebé másimu hasoru Maubale maibé sempre falla iha finalidade tanba defeza Maubale sempre hamate jogu ne’ebé FIEL halo, ikus FIEL labele halo buat ida.

Ho velosidade jogu ne’ebé mka’as iha minutu 22 jogadór Maubale Calistro Pereira (22) komete erru hasoru jogadór FIEL árbitru deside fó kedan kartaun kinur, hanesan samada atensaun nune’e labele halo tan erru iha kampo laran durante jogu la’o.

Ho ritmu jogu ne’ebé aas, Maubale mós la nonok, halo defensizu hamosu mós jogu ofensivu oinsa bele halo golu lais. Jogu hotu ne’ebé Maubale halo hela de’it hanesan jogu tanba FIEL sempre hamate tutuir. Oportunidade barak mak avansadu Maubale hetan maibé la ezekuta ho di’ak, sutu barak mós avansadu Maubale lansa barak liu la kona iha alvu no barak mós guarda rede FIEL tenta baku sai.

Ho forsa jogu ne’ebé armada rua iha, halo falla ba sira atu prodús golu nune’e to’o minutu jogu primeira parte termina laiha ekipa ida mak hatama golu, nune’e provijoriu empata 0-0.

Dolar ba segunda parte, jogadór sira kontinua hamoris hika’as kontra no atake ne’ebé sira hala’o ona iha primeira parte. Maibé kontra no atake hirak ne’e kontinua hela de’it hanesan kontra no atake tanba la prodús golu.

Iha minutu 46 treinadór Maubale Moisés da Silva halo mudansa jogu, dada sai jogadór númeru kamijola 8 hodi hatama fali jogadór númeru kamijola 7 nune’e bele halo moris jogu iha parte klaran nian, maibé nafatin la fó rezultadu pozitivu.

Ho tensaun jogu ne’ebé maka’as halo jogadór FIEL Pedro Fernandes (4) emosaun halo falta hasoru jogadór Maubale ikus árbitru deside fó kartaun kinur hanesan atenssun.

Nune’e jogu la’o to’o minutu 56 Moises deside hasai tan jogadór númeru kamijola 11 hodi hatama fali jogadór númeru kamijola 9, nune’e bele halo barullu jogu iha lina oin.

Ho mudansa ne’e halo FIEL sente araska atu ultrapasa lina Maubale, ho nune’e iha minutu 61 treinadór Ameta deside dadasai jogadór númeru kamijola 15 hodi substitui fali jogadór númeru kamijola 24 hodi responde atake ne’ebé Maubale lansa. Maibé seidauk responde ho di’ak Maubale nia presaun, nune’e iha minutu 65 Ameta dada sai tan jogadór númeru kamijola 94 hodi dudu tama fali jogadór númeru kamijola 28.

Husi mudansa ne’ebé FIEL halo hatudu duni prova no konsege halo defeza Maubale nian halai sala no ikus iha minutu 65 bola barullu iha lina oin Maubale nian drfeza Maubale la antisipa ho di’ak bola kona liu defeza nia liman nune’e árbitru fó kedan penalidade ba FIEL hodi sutu livre.

Oportunidade ne’e halo FIEL kontente haksoit ba mai, sira fiar mein atu manán ona jogu. Penalidade ne’e ezekut husi jogadór númeru kamijola 9 maibé ho fuan ne’ebé nakdedar ikus sutu ne’ebé nia lansa guarda rede Maubale baku sai no la rezulta golu.

Rezultadu ne’e halo Maubale kontente no FIEL hela ho tristeza. Adeptus sira hakilar ho lian maka’as iha kampo laran fó suporta ba sira nia ekipa favoritu.

Haree ba FIEL nia performe ne’ebé brillante treinadór Maubale deside halo mudansa jogu hodi dada sai tan jogadór númeru 22 hodi hatama fali jogadór númeru 24 iha minutu 66 nune’e bele halo jogu ofensivu másimu liutan.

Iha minutu 82 jogadór Maubale númeru kamijola 7 hetan oportunidade lori bola livre, defezs FIEL Pedro Fernandes sente atu lakon bola ikus nia foti desizaun halo falta hodi halo falla jogadór Maubale ne’e labele prodús golu. Ikus bola la golu duni, árbitru tau matan kedan ba Pedro hodi losu kartaun kinur fó ba nia hasai tan kartaun mean hodi fó no haruka jogadór ne’e tenke sai kedan mai liur, laiha dureitu joga tan iha kampo laran.

Nune’e FIEL hela de’it jogadór 10 iha kampo laran. Maibé la sai obstakulu ba FIEL hodi hala’o jogu. Sira nafatin hala’o hodi aguenta to’o jogu termina.

Maibé iha minutu 82 jogadór Maubale Vasco Boavida (4) halo falta hasoru jogadór FIEL ikus árbitru foti desizaun fó kartaun kinur ba jogadór ne’e. Iha minutu 90+3 jogadór Zezinho (14) da Costa halo erru hasoru jogadór FIEL árbutru tenke fó tan kartaun kinur ba jogadór ne’e.

Husi rezulradu ne’e mudansa ba jogadór entre ekipa rua halo ekipa forte liutan. Jogu sai manas liutan ikus ekipa rua tenke hela ho empata 0-0 no fahe de’it pontu ida-ida ba malu tanba minutu 90 termina adisionál tan minutu haat maibé nunka rezulta golu.

Jogu ne’e dirije husi árbitru prinsipál Fernando da Costa, juiz liña Henrique Pereira, Paul Costa no árbitru rezerva Bernanrdinho Mascarinhas.

Notísia relevante: DIT FC ho Relay FC fahe pontu ba malu iha abertura kopa FFTL

Jornalista: Hortencio Sanchez

Editór: Florencio Miranda Ximenes