SOSIEDADE SIVĺL

International Children’s Day: “Labarik mak esperansa ba nasaun no kreda nian”

International Children’s Day: “Labarik mak esperansa ba nasaun no kreda nian”

Sua Eminénsia Dom Virgílio Kardeál do Carmo da Silva, SDB. Imajen /Tatoli

DILI, 01 juñu 2024 (TATOLI)–Arsebispu ArkIdioseze Metropolitana Dili, Dom Virgílio KardeÁl do Carmo da Silva, SDB, hateten labarik mak esperansa mundu, nasaun no kreda nian, tan ne’e ema hotu iha nia responsabilidade atu tane aas direitu labarik sira-nian.

Dom Virgílio hateten, maske labarik timoroan balun seidauk hatene sira loron ne’ebé selebra kada tinan iha mundu, maibé hakarak nafatin fó parabéns sira-nia loron espesiál, loron mundiál labarik (International Children’s Day) ne’ebé kada tinan mundu selebra kada loron 01 juñu.

“Uluk nana’in ha’u-nia parabéns ba labarik hotu iha mundu ne’ebé mak selebra loron labarik ninian. Partikularmente hakarak hanoin labarik timóroan hotu-hotu liuliu sira-ne’ebé iha foho, lahetan oportunidade no lahatene saída mak loron labarik nian, ne’eduni ha’u hakarak fó parabéns ba sira hotu iha loron boot ida-ne’e. Labarik mak esperansa mundu nian, uma kreda nian, esperansa Timor ninian. Labarik mak futuru nasaun, mundu no igreja mak labarik sira,” Dom Virgílio Kardeál do Carmo da Silva, SDB, hateten ba Tatoli, hafoin selebrasaun solenidade Corpo de Deus, iha Lecidere.

Se labarik sira mak futuru ba nasaun, mundu no kreda, entaun sosiedade, inan-aman, ukun na’in sira no ema hotu presiza tau matan ba labarik sira.

“Ita hotu tenki halo saída. Hatene kuida no tau matan ba labarik sira, tau matan ba sira-nia formasaun, tau matan ba sira-nia saúde, tau matan ba sira-nia dignidade no direitu labarik. Buat hotu ne’ebé ema ida tenke iha, ita tenke ajuda sira, atu hetan fasilidade hotu-hotu hodi sira bele krese no boot atu bele kontribui ba iha future,” nia dehan.

Se ema hotu kontribui di’ak ba iha formasaun labarik sira-nian, labarik sira sei kontribui di’ak ba iha dignidade rai ida-ne’e nian iha futuru.

“Ema hotu tenke fó ezemplu di’ak ba labarik sira, tanba sira haree buat ladi’ak husi ema boot, ne’e sei saí labele halo. Entaun, se ita hadomi rai Timor, pás, maske ki’ak, ita buka fó liman ba malu,” nia dehan.

Istória loron mundiál labarik

Entretantu, istória ba Loron munidál ba labarik (International Children’s Day) selebra kada tinan akontese iha loron 1 juñu, iha loron ida-ne’e hanesan parte ida hosi objetivu ne’ebé bootliu atu hakotu violasaun ba labarik sira-nia direitu no esforsu ida ba labarik sira iha mundu bele moris seguru.

Istória Loron mundiál ba labarik monu iha 01 juñu. Loron mundiál ba labarik sira nu’udar selebrasaun bem-komun no direitu labarik sira-nian iha mundu tomak. Loron mudiál ba labarik selebra hanesan parte ida hosi proklamasaun 1925 iha Jenebra iha knferénsia mundiál kona-ba labarik sira-nia moris di’ak.

Loron mundiál labarik ne’e hahú hosi Pastór/Pendeta Dr. Charles leonard iha tinan 1857, momentu ne’eba nia realiza servisu espesiál ba labarik sira iha igreja sai hanesan ábitu ida selebra kada tinan ne’ebé hanaran Rose Day.

Iha tinan 1949, Federasaun Demokrasia Internasionál Feto hasoru malu iha Rúsia no harii Protesaun Labarik Mundiál dahuluk ka lohin loron koñesidu sai hanesan Loron Mundiál Labarik (International Children’s Day). Hahú hosi ne’e, Loron Mundial Labarik selebra iha mundu rai-klaran iha loron 01 juñu 1950.

Loron Mundiál ba Labarik Organizasaun Nasaun Unida (ONU) dekreta liuhosi Deklarasaun Direitu ba Labarik, liuhosi Asembleia Jeral Nasaun Unida iha tinan 1959.

Iha Timor-Leste, bazea Konstituisaun RDTL prevista iha artigu 10, kona-bá protesaun ba labarik-oan sira.

Iha pontu dahuluk, sita kona-ba labarik sira iha direitu ba protesaun espesiál husi família, komunidade, no mós estadu, liuliu hasoru hahalok hotu hanesan la tau-matan, diskriminasaun, violénsia, opresaun, abuzu seksuál no explorasaun.

Pontu daruak, sita kona-b’a labarik sira hetan direitu hotu-hotu ne’ebé mundu rekoñese, hanesan direitu sira-ne’ebé hakerek ona iha konvensaun internasionál, ne’ebé estadu aprova no simu ona ka ratifika fila-fila.

No pontu ikus, sita ona-bá labarik hotu-hotu ne’ebé moris iha kazamentu nia laran ka lae, iha direitu hanesan kona-ba protesaun sosiál.

Jornalista : Jesuína Xavier

Editór        : Cancio Ximenes

iklan
iklan

Leave a Reply

iklan
error: Content is protected !!