iklan

JUSTISA, HEADLINE

Tribunál liberta arguidu BMF ne’ebé prodús kupon SDSB falsu husi sela detensaun PNTL  

Tribunál liberta arguidu BMF ne’ebé prodús kupon SDSB falsu husi sela detensaun PNTL  

Imajen/Natalino da Costa

DILI, 01 juñu 2024 (TATOLI)- Tribunál Judisiál Primeira Instánsia Dili (TJPID), iha sábadu (01/6), liuhusi Juiza Albertina Neves, deside liberta arguidu ho insiál BMF ne’ebé produs SDSB falsu husi sela detensaun Komandu PNTL Dili.

Razaun Tribunál liberta arguidu BMF  tanba arguidu kompleta ona prosesu detensaun durante oras 72 iha sela Komandu PNTL Dili.

Arguidu BMF durante halo atividade produs kupon ka Sdsb falsu nune’e  iha kinta (30/5) foin lalais ne’e ekipa konjunta halo detensaun ba  nia iha área Aldeia Aitutu Suku Ailok, Postu Administrativu Cristo-Rei, Munisipiu Dili.

Ho hahalok arguidu nia ne’e Ministériu Públiku promove krime falsifikasaun agravadu ne’ebé previstu iha artigu 304 Kódigu Penál Timor-Leste.

Maibé to’o tiha Tribunál liuhusi Juiz Titulár ne’ebé ka’er prosesu ne’e, Juiz Albertina Neves, haree katak faktu no krime ne’ebé Ministériu Públiku promove ba arguidu ne’e tuir Tribunál la priese rekezitu prosesu sumáriu no mós prosesu interrogatóriu dahuluk, nune’e, Tribunál deside hodi liberta de’it arguidu BMF husi sela detensaun

Hafoin liberta, Tribunál haruka Ministériu Públiku kontinua halo investigasaun ba arguidu BMF hodi kompleta tán faktu sira, nune’e foin enkamiña ba fali Tribunál hodi  deside atu halo prosesu  sumáriu ka interrogatóriu dahuluk ba arguidu ne’e.

Iha biban ne’e, Defeza hosi arguidu BMF, Defensór Públiku, Juvinal Yenes Freitas, hateten, Tribunál deside liberta de’it nia kliente husi sela detensaun  Komandu PNTL Dili tanba nia kumpre ona prosesu detensaun 72.

“Tribunál  deside la halo prosesu interrogatóriu dahuluk ba arguidu BMF tanba faktu ne’ebé Ministériu Públiku aprezenta ba Tribunál ne’e la priense kritériu Interogatoriu dahuluk nian  no husu Ministériu Públiku kontinua halo investigasaun ba kazu ne’e molok submete fila fali ba Tribunal atu haree”, nia afirma.

Notísia relevante:SIKN detein suspeitu prodús kupon SDSB falsu

Jornalista: Natalino Costa  

Editór: Florencio Miranda Ximenes

iklan
iklan

Leave a Reply

iklan
error: Content is protected !!