VIQUEQUE, 01 juñu 2024 (TATOLI)-Koordenadór Ensinu Báziku Osokaiua, suku Afaloikai, postu administrativu Uatulari, munisípiu Viqueque, Marcelino Amaral, hateten katak distribuisaun profesór, EBF Osokai la hetan dadauk ne’e profesór matein na’in-ida hanori primeiru suiklu to’o segundu siklu.
“Foin lalais servisu eduksaun halo ona distribuisaun profesór ba eskola sira iha munisípiu Viqueque, maibé iha ha’u-nia eskola ne’ebé uluk profesór ha’u mesak sei la hetan nafatin profesór ida hodi reforsa ha’u. Ida-ne’e ha’u sente sai difikuldade ba ha’u no eskola rasik tanba manorin na’in-ida mak kobre husi klase 1 to’o klase 6,” Marcelino Amaral, hateten ba Agência TATOLI, iha salaun servisu edukasaun Viqueque, Beloi, sesta ne’e.
Nia konta, EBF Ossokaiua uluk profesór hamutuk na’in tolu mak hanorin, maibé na’in rua mate ona no to’o agora seidauk iha subtituisaun ruma ba profesór sira ne’e.
“Ha’u garante tiha ba bolsa rekrutamentu ne’ebé foin lalais Ministériu Edukasaun halo, maibé rezulta iha distribuisaunn profesór ba eskola sira EBF Osokaiua la hetan nafatin. Ha’u sente triste tanba laiha ema ida maka ajuda ha’u hodi hanorin,” nia haktuir.
Manorin-na’in ne’e dehan, profesór na’in ida impaktu tebes ba estudante sira tanba profesór ba hanorin iha tiha sala ida, entaun estudante husi saladeaula seluk tenke abandona no estudante sira halimar de’it.
“Dalaruma enkontru ruma iha postu no munisípiu ha’u ba tiha loron tolu ka semana ida, tenke abandona estudante sira no estudante sira maka sai vítima tanba ha’u maka koordenadór no profesór hanorin estudante sira”, nia subliña.
Nune’e nia husu, Governu liuhusi ME futuru se halo rekrutamentu ba profesór haruka mós ba EBF Ossokaiua hodi hanorin estudante sira.
Matéria sira ne’ebé hanorin iha EBF Osokaiua maka hanesan matéria lian portugés, lian tetun, matemátika, siénsia naturál, siénsia sosiál, edukasaun sívika, arte no kultura, inklui relijiaun.
Tuir dadus estudante, eskola EBF Osokaiua iha estudante totál hamutuk na’in-33 kompostu husi klase 1 to’o klase 6 no profesór na’in-ida.
Entretantu, iha loron 21 fulan-maiu servisu edukasaun munisípiu Viqueque aloka ona profesór hamutuk na’in-41 ba eskola EBF no EBC sira hamutuk 16 iha munisípiu Viqueque.
Jornalista : Vitorino Lopes da Costa
Editór : Florêncio Miranda Ximenes
