COVALIMA, 02 juñu 2024 (TATOLI) – Sekretáriu Estadu Protesaun Sivíl, Domingos Mariano Reis, domingu ne’e, observa direta vítima dezastre naturál ho tipu inundasaun iha sentru evakuasaun Eskola Sekundáriu Públiku Suai, ne’ebé lokaliza iha aldeia Akar-Laran, suku Suai loro, postu administrativu Suai, munisípiu Covalima.
Sekretáriu Estadu ba Protesaun Sivíl, Domingos Mariano Reis fó hanoin katak, iha tinan 2023 populasaun husi suku Zulo, postu Zumalai mak sai vítima ba dezastre naturál ho tipu rai halai hamutuk xefe família 126.
“Sekretáriu Estadu Protesaun Sivíl lori nonu Governu Konstituisionál ne’ebé lidera husi Primeiru Ministru Kay Rala Xanana Gusmão hato’o solidariedade ba vítima dezastre naturál, iha Covalima hahú loron 30 Maiu to’o loron 1 fulan Juñu iha Covalima,” Domingos Mariano Reis hateten.
Tuir dadus ne’ebé nia simu, vítima dezastre naturál iha sentru evakuasaun Covalima ho totál populasaun 223 ho xefe família hamutuk 99, la inklui dadus vítima dezastre naturál husi postu administativu Zumalai, Maucatar, Tilomar no Suai hamutuk 167.
Nia prezensa iha Covalima la’ós observa de’it kondisaun vítima dezastre iha sentru evakuasaun, maibé observa mós fatin risku dezastre naturál iha aldeia Akar-Laran no iha fatin sira seluk nune’e bele halo koordenasaun ho ministériu relevante sira hodi buka solusaun.
Governante ne’e agradese ba Servisu saúde munisípiu Covalima, komandante PNTL ho nia membru no parseiru husi Cruz Vermelha Timor-Leste (CVTL) no WF fó apoiu másima ba APC hodi evakua vítima dezastre ba sentru evakuasaun ho seguru.
Prezidente Autoridade Munisípiu Covalima, Miguel Armanda Cardoso rekomenda ba Sekretaria Estadu Protesaun Sivíl atu rezolve problema inundasaun, tanba kada tinan populasaun Covalima sempre vítima ba dezastre naturál.
“ Ba futuru ha’u lakohi fó hela de’it apoiu emerjénsia no halo evakuasaun ba vítima dezastre naturál ho tipu inundasaun, tanba ne’e presiza buka meiu ita tau hanoin hamutuk bele rezolve problema inundasaun,” nia fó hanoin.
Jornalista: Celestina Teles
Editór: Evaristo Soares Martins
