MNEK: konfrontu iha “Fátima” Portugál hatun imajen Timor-Leste iha mundu
DILI, 03 juñu 2024 (TATOLI)-Diretór-Jerál ba Assuntu Bilaterál ba Amérika Latina, Europa no Afrika iha Ministériu Negósiu Estranjeiru no Kooperasaun (MNEK), Francisco Deonisio Maucura, informa katak halo ona kontaktu ho Embaixada Timor-Leste iha Lisboa, Portugál katak timoroan sira mak asalta malu duni iha Fátima, segunda matrugada ne’e,hahalok ida-ne’e hatun imajen Estadu Timor-Leste iha mundu
“Ita hotu xokadu no triste simu informasaun kona-bá konfrontu entre ita nia joven sira iha kapitál Fátima Portugál loron ida liu ba. Ita hotu triste no ami kontaktu kedas ita nia diplomata sira iha Lisboa no sira relata mai katak akontese duni konfrontu entre ita nia joven sira iha ne’ebá,” Maucura katak ba Agência TATOLI iha edifisiu MNEK Dili, segunda ne’e.
Ho situasaun ne’e, nia dehan foin dahuluk akontese asaltu malu iha fatin sagradu santuáriu Fátima, ida ne’e mak halo ema hotu triste.
“Fatin santuáriu, entaun ida ne’e hatudu ita nia joven sira laiha ona sensibilidade, ida- ne’e mós hatudu ona preokupasaun jerál ba ita hanesan Timor degradasaun morál. Dehan ba para atu buka servisu maibé to’o iha ne’eba mosu problema lori problema ódiu no vingansa iha Timor-Leste kontinua lori ba to’o Portugal,” nia lamenta.
Asaltu malu ne’e, Nia konsidera joven hirak ne’e estraga ona imajen Timor-Leste nian iha mundu no iha Europa.
“Ita iha ne’e halo hela diplomasia ho nasaun seluk atu simu ita nia timoran ba servisu, maibé ita nia joven sira nia hahalok hanesan ne’e taka odamatan (oportunidade) ba maluk sira seluk. Tanba nee ita hotu nia preokupasaun, ita hotu simu todan ida ne’e, hanesan Estadu, Governu no sosiedade timorense hanesan, mós inan-aman simu hotu todan ida ne’e no simu responsabilidade ida ne’e,” nia katak.
Tuir informasaun ne’ebé hato’o husi Embaixada Timor-Leste iha Lsiboa katak, autoridade portuguesa sira komesa halo hela investigasaun no tau ona orden (põe em ordem) para oinsá bele hamate tiha joven hirak ne’e nia konfrontasaun nune’e bele ba hatan tuir lei Portugál nian.
Seidauk iha Kronolojia husi konfrontu ne’e
“Motivu konfrontu ne’e, ita seidauk hatene maibe MNEK kontinua akompaña hela prosesu investigasun hodi hatene motivu husi konfrontu ne’e. Ita mós halo hela koordenasaun ho Ministeriu relevante sira hanesan servisu imigrasaun Ministériu Interiór no Ministériu Juventude Desportu Arte no Kultura hodi haree oinsá pasu sira tuir mai,” Diretór ne’e tenik.
Dadaun ne’e, Polisia Portugál kaer ona joven balu lori ona ba justisa, no Governu esforsu hela oinsa koordena ho Governu Portugál hodi foti desizaun hasoru joven hirak ne’e.
“Sira neebe envolve iha krime tenke responsabiliza ba sira nia aktu tanba lei ne’e lei, ema hotu hotu iha lei nia okos. Autoridade Portugés sei halo hela investigasaun, nune’e rezultadu investigasaun sei haruka mai ita depois Governo rai rua hanoin hamutuk mak atu foti desizaun,” katak.
Nia hatutan, sei reve fali akordo bilaterál nasaun rua nian hodi haree karik iha possibilidade bele deporta kriminozu sira ne’e mai Timor-Leste.
“Maibé ita seidauk to’o iha desizaun ida ne’e, tanba MNEK sei koordena hela ho servisu imigrasaun hodi haree assuntu ida ne’e hodi rekolla dadus kona-ba timoroan sira ne’e ba iha Portugál se mak haruka sira bá no sira ba ho se no motivu bá iha Portugal ne’e atu halo saida. Depois halibur tiha dadus sira ne’e hotu mak foin bele foti desizaun ikus,” salienta.
Joven na’in hira mak envolve iha konfrontu ne’e seidauk hatene loos, no joven na’in hira mak kanek no mate mós seidauk simu informasaun klaru.
Jornalista: Hortencio Sanchez
Editór: Florencio Miranda Ximenes
