HEADLINE, KAPITÁL

Dezde abríl lixu iha kapitál Dili hahú menus

Dezde abríl lixu iha kapitál Dili hahú menus

Ekipa saneamentu rekolla hela lixu iha kapitál Dili. Imajen Tatoli/António Daciparu

DILI, 04 juñu 2024 (TATOLI) – Xefe Departamentu Saneamentu iha Autoridade Munisipál Dili (AMD), Domingos dos Santos Soriano, informa hahú hosi fulan-Abríl to’o agora lixu iha kapitál Dili hahú menus ona.

“Hosi janeiru mai to’o marsu, ita haree lixu kontinua makas, tanba ne’e ita aumenta kareta kamioneta 50, hahú hosi abríl mai to’o agora, ami haree katak lixu hahú redús ona iha kapitál Dili”, Domingos dos Santos Soriano informa ba TATOLI iha nia kna’ar fatin AMD Matadoru, ohin.

Nia hatete, iha buat balun mak sei probelma tanba ne’e mak Autoridade Munisípiu Dili hasa’e ona sirkulár ba emprezáriu sira hanesan loja sira idaidak tula rasik lixu ba tibar, maibé realidade sira nafatin so’e iha lixeiru sira ne’ebé mak iha.

“Iha parte ida mak sei iha problema, bainhira ami hasai ona sirkulár ba emprezáriu sira liuliu loja sira prodús lixu barak, maibé la soe iha tibar, realidade sira soe nafatin iha lixu komunidade, tanba ita-nia sirkulár iha ne’eba hateten katak lixu tenke so’e kalan, entaun ita-nia maluk timoroan sira halo kontratu ho xineza sira no kalan sira la lori lixu ba so’e iha tibar, maibé sira so’e de’it ba fatin lixu sira ne’ebé mak livre iha estrada ninin iha kapitál Dili, ida-ne’e akontese no ita labele kaer tanba ita-nia sirkulár hateten katak so’e kalan, entaun sira so’e iha oras 11, lae 12 kalan, se mak atu kontrola ida-ne’e atu fó sansaun”, nia afirma.

Nia hateten, pesoál laiha atu halo monitorizasaun ba ema sira ne’ebé mak so’e lixu kalan tanba ne’e husu sira-nia konsiénsia atu soe lixu iha tibar.

“Iha empreza ida ka rua mak halo tuir sirkulár ne’ebé ita fó sai katak lori sira-nia lixu ba fakar iha tibar, ezemplu Timor Plaza sira lori rasik sira-nia lixu ba fakar iha tibar, tanba ne’e husu ba loja sira seluk ho konsiénsia katak ida-idak tenke lori ba fakar, labele tau hamutuk ho lixu komunidade nian”, nia konklui.

Jornalista : Felicidade Ximenes

Editór : Zezito Silva

iklan
iklan

Leave a Reply

iklan
error: Content is protected !!