HEADLINE, SAÚDE

HNGV planeia rekruta tán pesoál saúde 700 hodi haforsa 

HNGV planeia rekruta tán pesoál saúde 700 hodi haforsa 

Provedór Direitus Humanu no Justisa (PDHJ), Virgílio da Silva Guterres 'Lamukan’ halo Vizita no fiskalijasaun ba Hospital Nasional Guido Valadares ( HNGV). Iha hnvg, tersa (04/06). Imajen Tatoli /Egas Cristovão

DILI, 04 juñu 2024 (TATOLI) – Diretora ezekutiva interinu HNGV, Sara Maria Filomena Xavier, dehan HNGV sei halo tan rekrutamentu ba pesoál saúde hodi bele reforsa atendimentu iha ospitál nasionál.

“Ita-nia rekursu umanus sufisiente, maibé ita nafatin iha planu atu rekruta tán ita-nia pesoál saúde sira atu haforsa tan ita-nian rekursu umanu iha HNGV, tanba ita-nia pasiente sira iha ospitál nasiona bele mai hosi tranferénsia moras husi ospital rejionál no referál sira inklui mós sentru saúde iha Dili laran. Entaun ita presiza rekursu umanu ne’ebé sufisiente para hodi atende ita-nia pasiente sira ho di’ak no kualidade”, Sara Maria hateten ba jornalista sira hafoin  hasoru malu ho PDHJ iha HNGV, tersa ne’e.

Nia esplika, totál médiku agora daudaun servisu iha HNGV, iha espesialista 67, enkuantu médiku jerál iha 200, parteira iha 80 no enfermeiru iha 300-resin

“Ita purvolta de 1114 traballadores ne’ebé servisu iha HNGV, inklui mós ekipa médika brigada Xina no Cuba ne’ebé mak suporta atendimentu pasiente sira iha HNGV”, nia afirma.

Tanba ne’e, tuir planu no tuir mapamentu pesoál saúde iha HNGV, ita presiza tán 700 atu responde mós sala pediatria andar lima ne’ebé agora daudaun iha hela prosesu konstrusaun.

“Ita-nia rekrutamentu ida-ne’e, atu rekruta etapa pur etapa, no planu ida-ne’e ita bele halo iha tinan ida-ne’e no mós ba ba 2025, hodi bele priénse númeru ne’ebé ideál ba atendimentu pasiente sira iha HNGV”, nia konklui.

Jornalista: Natalino Costa  

Editór : Zezito Silva

iklan
iklan

Leave a Reply

iklan
error: Content is protected !!