HEADLINE, MUNISÍPIU, OÉ-CUSSE (RAEOA), SOSIEDADE SIVĺL

AJTL-TLPU kondena protokolu PA RAEOA impede serbisu Jornalista

AJTL-TLPU kondena protokolu PA RAEOA impede serbisu Jornalista

Iha imajen ne’e hatudu katak protokolu Prezidente Autoridade RAEOA tenta atu tuku tán jornalista Abílio Elo Nini. Imajen espesiál.

DILI, 05 juñu 2024 (TATOLI) — Asosiasaun jornalista sira komposta hosi Asosiasaun Jornalista Timor Leste (AJTL) no Timor Leste Press Union (TLPU) kondena aktu protokolu Prezidente Autoridade Rejiaun Administrativa Espesiál Oé-Cusse Ambeno (RAEOA), Aquito Roxaca Guterres tanba impende servisu jornalista iha momentu halo hela atividade jornalístika.

Prezidente AJTL, Zevonia Viera lamenta hahalok protokolu RAEOA ne’ebé rasta Jornalista destakadu husi Agência TATOLI, I.P tanba hahalok ne’e impende serbisu Jornalista sira nian.

AJTL mós konsidera asaun prokokolu nia ne’e hanesan tentativa ida-ne’ebé fó ameasa ba Liberdade imprensa no Liberdade espresaun ne’ebé garante ona iha Konstituisaun Repúblika Demokrátika Timor-Leste iha artigu 40 no 41.

“Asaun ne’ebé protokolu halo ba Jornalista TATOLI,I.P ne’e, AJTL konsidera hanesan tentativa atu limita no impede servisu Jornalista nia, nune’e AJTL kondena hahalok protokolu ne’e. AJTL mós sei halo konferénsia imprensa ba públiku hodi lamenta no kondena asaun ne’e,” Prezidente AJTL ne’e lamenta.

AJTL mós konsidera asaun ne’ebé halo husi protokolu ne’e nu’udar ameasa ida atu indeks Liberdade bele tún aatliu tanba iha tinan ne’e indeks Liberdade imprensa tún ona ba 20.

Nune’e, AJTL rekomenda ba instituisaun Estadu hotu liuliu Autoridade RAEOA atu fó formasaun ba protokolu sira atubele komprende papél Jornalista sira-nian iha terrenu.

“Tanba AJTL nota katak protokolu RAEOA ne’e rasik la hatene papél jornalista sira, liuliu oinsá atu kobre asuntu sira-ne’ebé importante hodi fornese ba sidadaun hotu atu akompaña no hatene prosesu dezenvolvimentu ne’ebé akontese iha Timor-Leste,” nia hateten.

Prezidente Timor-Leste Press Uniaun (TLPU), Candido Alves, lamenta no kondena maka’as hahalok protokolu Prezidente Autoridade RAEOA ne’ebé halo impedimentu ba serbisu jornalista iha fatin públiku.

“TLPU la tolera no kondena maka’as hahalok protokolu ka funsionáriu Prezidente Autoridade RAEOA nia ne’ebé rasta Jornalista destakadu Agência TATOLI, I.P Abílio Elo Nini to’o monu, tanba ne’e TLPU konsidera aktu ne’e ameasa ida atu hamate Liberdade imprensa iha Timor-Leste, piór liu la respeita Konstituisaun Repúblika Artigu 40 no 41,” Prezidente TLPU ne’e lamenta.

Daudaun ne’e, TLPU simu ona kronolojia husi Jornalita Abílio Elo Nini, nune’e tempu badak sei halo karta protesta ida ba Prezidente Autoridade RAEOA, Rógerio Tiago Lobato, atubele fó xamada ba nia protokolu ka funsionáriu ne’e tanba lahatene étika protokolu.

“TLPU sei halo karta protesta ida ba Prezidente Autoridade RAEOA atu fó Xamada ba protokolu ne’e tanba impede serbisu jornalista iha fatin públiku liuliu serimónia ne’e importante atu publiku bele akompaña,” nia katak.

Xefe Redasaun Agência TATOLI, Xisto Freitas da Piedade, sente lamentável tanba iha espasu públiku la dívia akontese nune’e.

“To’o agora jornalista sira nafatin hetan intimidasaun no ameasa sira. Hanesan Xefe Redasaun sei halo karta protestu ida ba Gabinete Prezidente Autoridade RAEOA nian kona-ba kazu ne’e, tanba aktu ne’e viola Konstituisaun RDTL artigu 41 no lei Komunikasaun Sosiál,” Xefe Redasaun Agência TATOLI ne’e fundamenta.

Nia dehan, artigu 8 hosi Lei Komunikasaun Sosiál katak, liberdade imprensa direitu jornalista sira-nian hodi fó-hatene ezerse tuir prerogativa konstitusionál, labele sai nu’udar objetu influénsia ne’ebé koko hasouru ninia independénsia no objetividade, liberdade kriasaun, liberdade hodi fó-sai saida maka iha neon, ninia direitu hodi buka no hetan informasaun, sijilu profisionál no direitu hodi partisipa iha orientasaun editoriál iha meiu komunikasaun sosiál ba ida-ne’ebé servisu ba, la sakar fali devér deontolójiku sira iha ninia knaar.

Kronolojia kazu rasta monu Jornalista TATOLI

Protokolu Prezidente Autoridade Rejiaun Administrativa Espesiál Oé-Cusse Ambeno (RAEOA) Rogério Tiago Lobato, ho naran kompletu Aquito Roxaca Guterres, rasta monu jornalista Agência Notisioza Timor-Leste, Institutu Públiku (TATOLI, IP) Abílio Elo Nini, bainhira hala’o hala’o hela atividade jornalístika nian iha otél Ambeno no tenta atu tuku tán.

Kazu ne’e akontese iha otél Ambeno, iha loron-tersa, tuku 17:00 lokraik, iha ámbitu serimónia akordu entre Autoridade RAEOA Rogério Tiago Lobato ho Timor Aid, atu estabelese Muzeu Tais Timor iha Oé-Cusse Ambeno.

Kazu ne’e akontese bainhira Prezidente Autoridade RAEOA ho Diretora Ezekutiva Timor Aid Maria do Ceu Lopes, asina akordu kona-ba atu estabelese Muzeu Tais.

Iha momentu ne’e akompaña husi Prezidente Repúblika José Manuel Ramos Horta, Vise-Ministru Komérsiu no Indústria Augusto Júnior Trindade, Sekretáriu Estadu Arte no Kultura Jorge Soares Cristovão, entaun mídia hotu-hotu ba hasai fotografia no halo filmajen.

“Hau-nia pozisaun tuur iha oin no kolega sira seluk hamriik no protokolu ne’e dehan labele besik, dook hosi ne’ebá. Hau hatán, dehan ha’u tuur de’it iha-ne’e, maibé protokolu lakohi, dehan labele tenke sai ba kotuk, sé ha’u ba kotuk, ita atu hasai foto no halo filamjen halo nusá, nune’e nia mai kaer ha’u-nia faru husi kotuk rasta ha’u to’o monu. Enatun ha’u hamriik kaer kamera ne’e atu baku nia tanba ha’u monu iha ema barak nia oin no fatin públiku, sementara ha’u serbisu hela,” Abíllio Elo Nini nu’udar vítima atuál Jornalista Destakadu Agência TATOLI nian iha RAEOA, informa kazu ne’e iha loron-kuarta ne’e.

Ne’e duni, asaun protokolu ne’e rasta monu jornalista Abílio Elo Nini ba kotuk bainhira serimónia asinatura ne’e la’o hela.

“Akontesimentu ha’u monu ne’e ba kotuk, no Prezidente Repúblika haree hela no hetan ami haksesuk malu, entaun ha’u kontinua hasai foto no halo vídeo, to’o asina akordu ne’e hotu, ami ba fali kotuk,” nia hateten.

Hafoin serimónia ne’e remata, jornalista sira sei halo entrevista ho Prezidente Repúblika, José Manuel Ramos Horta, Prezidente Autoridade RAEOA, Rogério Tiago Lobato no Diretora Ezekutiva Timor-Aid, Maria do Ceu Lopes.

Remata tiha entrevista, eskoltu hosi Prezidente Autoridade RAEOA konsege kaer liman no husu deskulpa ba Jornalista Abílio Elo Nini.

“Deskukpa brow, ohin ita monu ne’e ha’u hetan, ne’ebé ami-nia kolega mak sala, ne’ebé orsida mak ami fó hanoin nia,” eskoltu ne’e dada-lia ho jornalista sira.

Hafoin eskoltu ne’e ko’alia tiha, jornalista Abílio Elo Nini konsege hasoru malu ho protokolu ne’e, atu husu razaun kona-bá rasta monu iha fatin públiku ne’e.

“Ha’u buka nia no husu, razaun saida mak ita-boot rasta ha’u iha ema barak nia oin no fatin públiku, maibé nia dehan serbisu protokolu, nune’e husu tán tanba saida mak rasta ha’u iha públiku, maibé nia dehan nia mak loos. Nune’e nia hirus no foti liman atu tuku, maibé konsege asegura husi kolega jornalista RTTL no PNTL sira,” nia haktuir.

Jornalista: Florencio Miranda Ximenes

Editór: Evaristo Soares Martins

iklan
iklan

Leave a Reply

iklan
error: Content is protected !!