COVALIMA, 05 Juñu 2024 (TATOLI) – Diresaun Nasionál Pekuária, Ministériu Agrikultura, Pekuária, Peska no Floresta (MAPPF) estabelese grupu Haburas Busacucun, iha suku Debos, postu Suai, munisípiu Covalima, atu halo konservasaun ba animál nia hahán iha tempu bailoro.
Tékniku Diresaun Nasionál Pekuária, Feliciano Fernandes, dehan presiza konserva hahán ba animál, tanba durante ne’e iha tempu bailoro balada sira falta hahán.
“Ami implementa programa konservasaun hahán ba animál iha Covalima, Manatuto no Bobonaro, tanba durante ne’e, ita-nia komunidade kuda rasik, maibé tempu bailoro animál nia hahán menus. Ho programa ne’e ami atu konserva hahán iha fatin ida, bainhira hahán ba animál laiha karik bele responde ho hahán adisionál”, Feliciano Fernandes hateten iha Busacucun, ohin.
Xefe grupu Haburas Busacucun, Martinho Barros, agradese ba Diresaun Pekuária ne’ebé forma grupu konserva hahán rezíduu ba animál iha tempu bailoro, tanba animál sira falta ba alimentasaun.
“Ha’u apoia programa ne’ebé Governu implementa atu rai hahán ba animál iha tempu bailoro, tanba ita hatene tempu bailoro animál sira laiha hahán”, dehan.
Xefe aldeia Busacucun, Januário Amaral do Carmo, reforsa katak molok Diresaun Pekuária atu forma grupu, sira halo identifikasaun no fó formasaun hodi esplika kona-ba lala’ok atu konserva hahán ne’ebé populasaun rasik prodús.
“Ha’u sente programa ne’e apár ho komunidade nia situasaun, tanba ne’e, ohin, hahú taa ona ai atu konstrui uma konservatória rai hahán ba animál hodi prepara ba iha tempu bailoro”, nia hateten.
Xefe aldeia ne’e halo ona levantamentu ba dadus animál hamutuk 180, husi númeru ne’e bibi 80 karau 70, maibé animál balun la konsege rejista tanba komunidade lakohi koopera.
Jornalista: Celestina Teles
Editora: Maria Auxiliadora
