DILI, 05 juñu (TATOLI)—Komisaun A ne’ebé trata asuntu Justisa no Konstituisionál iha Parlamentu Nasionál (PN), kuarta ne’e, rona Ministériu Justisa (MJ) oinsá atu rezolve disputa rai.
“Ohin, ami rona informasaun husi membru Governu kona-ba problema rai nian, tanba Parlamentu Nasionál liuliu komisaun A simu beibeik keixa sira kona-ba problema disputa rai no oinsá atu rezolve,’’ Prezidente Komisaun A, Patrocínio Fernandes, hateten ba jornalista sira hafoin ramata audiénsia ho membru Governu husi Ministériu Justisa iha sala konferénsia Parlamentu.
Nune’e, komisaun hakarak hetan informasaun husi Governu nu’udar ezekutivu responsável ba jestaun polítika no relasaun ho lei sira-ne’ebé iha ona no oinsá mak lei sira-ne’e ninia implementasaun no intervensaun saida mak instituisaun Estadu nian hanesan MJ liuhusi Sekretária Estadu Terra no Propriedade (SETP) atua hodi bele redús gráfiku disputa rai.
Iha sorumutu ne’e, parte MJ hato’o esplikasaun ba deputadu sira-nia preokupasaun tanba preokupasaun ne’ebé deputadu sira iha husi loron ba loron gráfiku disputa rai ne’e aumenta ba beibeik, ho tipu disputa entre komunidade ho komunidade no autoridade ho komunidade rasik iha hotu, nune’e husu Governu atu haree alternativa tuir lei saida mak iha atu halo atuasaun no prevensaun.
Mezmu nune’e, Prezidente Komisaun A ne’e la fó sai detallu kazu disputa rai hira mak komisaun simu husi komunidade tanba la lembra, maibé iha kazu barak mak komisaun simu kada loron.
Durante sorumutu, deputadu sira mós hato’o preokupasaun liga ho arendamentu rai Estadu nian ne’ebé durante ne’e sai mós preokupasaun liuliu sidadaun sira okupa rai Estadu hodi arenda tutan ba ema seluk.
Ezemplu, nia dehan, arenda tutan ho xineza sira ho valór boot, nune’e husu oinsá mak Governu tau atensaun atu regulariza hodi hatama reseita ba kofre Estadu.
Tanba ne’e, liuhusi sorumutu responsável membru Governu tutela hato’o katak, Governu tau atensaun hodi bele rezolve disputa rai inklui atu regulariza rai Estadu sira no SETP iha komisaun terras ne’ebé haree espesífiku hodi rezolve disputa rai.
Parte MJ hato’o mós iha inisiativa lejislasaun balun sei aprezenta mai PN hodi bele hetan apresiasaun no diskusaun, no inisiativa lei nu’udar enkuadramentu legál hodi fó solusaun mós ba problema disputa rai.
Entretantu, audiénsia ne’e partisipa husi Vise Ministru Justisa, Paulo Remédio no Sekretáriu Estadu Terra no Propriedade (SETP), Jaime Xavier.
Entretantu, antes ne’e liuhusi reuniaun plenária iha PN, Deputadu CNRT Natalino dos Santos, Francisco Ikulai, Cedelízia Farria dos Santos, preokupa ho rai Estadu ne’ebé sidadaun sira halo arenda ho xineza sira ho valór osan boot, inklui perumahan sira tanba sidadaun sira balun konstrui uma aumenta, nune’e husu MJ liuhusi SETP atu tau atensaun hodi regulariza.
Jornalista : Nelson de Sousa
Editór : Cancio Ximenes
