BAUCAU, HEADLINE, MUNISÍPIU, SAÚDE, SEGURANSA

Asidente tráfegu iha Carabela rezulta ema na’in-rua lakon vida

Asidente tráfegu iha Carabela rezulta ema na’in-rua lakon vida

Asidente tráfegu ne'ebé akontese iha área Carabela, postu administrativu Vemasse, munisípiu Baucau, rezulta vitíma nain-rua lakon vida no na'in-ida hetan kanek, kinta (06/06). Imajen espesiál.

BAUCAU, 06 juñu 2024 (TATOLI) – Asidente tráfegu ne’ebé akontese iha área Carabela, postu administrativu Vemase, munisípiu Baucau, kinta ne’e, rezulta ema na’in-rua lakon vida no na’in-ida seluk hetan kanek.

Motorizada ho marka Honda Beat ho xapa-matríkula T.6323 hetan asidente iha oras 10:00 dadersan ne’ebé envolve motorista inisiál JG idade 24 no pasajeiru na’in-rua inisiál V no J ne’ebé diskonfia kauza husi velosidade másimu nune’e rezulta JG no V lakon vida, enkuantu J hetan kanek iha parte rento’os.

“Mana ida mate fatin, no JG to’o mai iis laiha ona bainhira ami halo ezaminasaun ba nia pulmaun, enkuantu labarik (feto) ne’e mak kanek iha rento’os,” Diretór Ezekutivu Ospitál Rejionál Eduardo Ximenes (HoREX, sigla portugés), Eduardo ximenes hateten iha Vila Nova, kinta ne’e.

Vítima JG ne’ebé lakon vida hafoin hetan asidente iha área Carabela, postu administrativu Vemasse no iha imajen ne’e iha hela Ospitál Eduardo Ximenes Baucau, kinta (06/06). Imajen Agência TATOLI/Natalino Belo.

Vítima J feto idade tinan-tolu ne’ebé hetan kanek kmaan iha parte rento’os no halo labarik ne’e trauma nune’e parte médiku HoREX Baucau sei kontinua halo tratamentu.

“Ita agora seidauk halo ezaminasaun ba nia tanba kondisaun trauma, maibé nia kondisaun di’ak hela,” Claudio Ximenes akresenta.

Tuir informasaun Ajénsia TATOLI rekolla katak, vitíma sira halo viajen husi diresaun Baucau ho destinasaun ba Manatuto, maibé to’o iha área Carabela mosu asidente hodi rezulta JG no V lakon vida.

Maria da Silva nu’udar sasin, haktuir, asidente referida mosu nia parte lahatene kauza loloos maibé konsege haree motorizada monu hodi rezulta V mate fatin, enkuantu JG inklui J transporta mai ospitál hodi hetan tratamentu.

“Ami haree mana toba iha-ne’ebá la book aan, entaun lori deit maun nee mai (HoREX), maibe maun mós la konsege salva, agora ha’u lori labarik ne’e mai tratamentu,” Maria da Silva konta.

Hakarak informa ba públiku katak, kronolojia hosi asidente tráfegu ne’e sei fó-sai hosi komandu PNTL munisípiu Baucau, tanba parte polísia halo hela identifikasaun hodi hatene motivu loloos hosi asidente ne’e.

Jornalista   : Natalino Belo 

Editór         : Evaristo Soares Martins 

iklan
iklan

Leave a Reply

iklan
error: Content is protected !!