SOSIEDADE SIVĺL

CET husu deskulpa ba Konferénsia Episkopál Portugeza

CET husu deskulpa ba Konferénsia Episkopál Portugeza

DILI, 06 juñu 2024 (TATOLI) – Konferénsia Episkopál Timorense (CET) husu deskulpa ba Konferénsia Episkopál Portugeza ba hahalok insidénsia asaun krime ka konforntu ne’ebé komete hosi joven timoroan sira iha Fatin sagrada Santuáriu Fátima iha Dioseze Leiria, Portugal.

Portavoz CET no Vigáriu Jerál Arsebispu Arkedioseze Metropolitana Dili, Padre Graciano Barros hateten “Ami, bispu sira Timor nian, manifesta ami-nia laran-susar no la konkorda ho kualker forma violénsia ne’ebé labele iha sosiedade nia le’et, liu-liu iha fatin-sira hanesan Santuáriu Fátima”.

“Liuhusi jestu públiku ida-ne’e, ami husu deskulpa ba povu portugés, ba Konferénsia Episkopál Portugeza, partikularmente ba sarani Dioseze Leiria nian, ba moradór no peregrinu sira Santuáriu Fátima nian ba hahalok joven sira ne’e nian ne’ebé perturba ona hakmatek no sakralidade Santuáriu nian”, Porta Voz CET no Vigáriu Jerál Arsebispu Arkedioseze Metropolitana Dili, Padre Graciano Barros, liuhusi konferénsia imprensa, ohin, iha Sede CET, Bidau Mota Klaran, Dili.

Saserdote ne’e mós reforsa, CET haruka ona karta eskrita kona-ba pedidu deskulpa ba aktu sira, konfrontu ne’ebé komete hosi joven sidadaun timoroan iha Leiria, Portugal.

Portavoz ne’e hateten, CET preokupadu tebetebes no lamenta ho konfrontu sira ne’ebé mosu iha madrugada domingu loron 02 juñu 2024 iha arredór Santuáriu Fátima nian iha Portugal ne’ebé kauza vítima mortál ida no balun kanek todan.

Vigáriu jerál mós apela ba Polísia Judisiária Leiria nian atu investiga didi’ak epizódiu konfrontu sira no CET hein ho ansia rezultadu investigasaun atu responsável aktu sira ne’e hetan julgamentu tuir lei sira ne’ebé vigór.

CET mós husu ba joven sira atu konverte aan no halakon ondas no espiral (hahalok) violénsia nian iha sosiedade.

Joven sira hotu ein-jerál, moris tuir sira-nia fiar sarani, respeita no hadomi malu no halibur hamutuk esforsu tomak atu halo bu’at di’ak iha rai ne’ebé de’it sira hela ba. Saserdote ne’e husu.

Jornalista: Jesuína Xavier

Editór: Cancio Ximenes

 

iklan
iklan

Leave a Reply

iklan
error: Content is protected !!