GSI Maucatar partisipa formasaun iha área nutrisaun
COVALIMA, 06 Juñu 2024 (TATOLI) – Organizasaun naun-governamentál Asosiasaun Rede Covalima fó formasaun ba Grupu Suporta Inan (GSI) husi postu Maucatar, munisípiu Covalima, iha área nutrisaun nian.
Jerente programa Asosiasaun Covalima, Quintino Amaral Barros, dehan asosiasaun disponibiliza formasaun, liuhusi Programa Nutrisaun no Seguransa, tanba durante ne’e foku de’it ba implementasaun programa seluk.
“Oinsá atu Grupu Suporta Inan sira ajuda pesoál saúde hodi kontinua fahe tutan informasaun ba komunidade kona-ba programa nutrisaun no seguransa alimentár, promove prátika saudável, haree nutrisaun inan no bebé foin moris no labarik, bee no saneamentu no ijiéne”, Quintino Barros hateten ohin.
Iha atividade ne’e, asosiasaun konvida Diretór Servisu Munisipál Seguransa Alimentár, Hilário Oliveira, mak sai oradór hodi aprezenta máteria kona-ba seguransa alimentár liga ba produsaun ai-han no oinsá atu konsome ai-han nutritiva, nune’e prevene má nutrisaun ba inan isin-rua no labarik idade 0 to’o tinan 5.
“Ko’alia kona-ba seguransa alimentár mak kondisaun ema bele asesu ba ai-han. Ko’alia kona-ba inseguransa baihira ema laiha ai-han no nia impaktu hodi hamosu má nutrisaun”, esplika.
Nia realsa katak agrikultór sira prodús hela ai-han ne’ebé nutritiva, maibé falta kõnesimentu maka han de’it mak etu no modo, maibé tuir loloos presiza han hahán ne’ebé fó forsa hanesan batar, ai-farina, foos-rai no ai-han fó protesaun mak ai-fuan, modo no seluk tan.
Iha sorin seluk, Sekretáriu Munisipál ba Asuntu Sosiál no Organizasaun, Filomeno Cardoso, alerta ba xefe suku sira atu serbisu hamutuk ho GSI hodi kombate má nutrisaun iha postu Maucatar.
“Ita presiza luta hodi kombate má nutrisaun. Hadomi ita-nia inan sira, nune’e sira bele isin di’ak, tanba programa ne’e di’ak nune’e ha’u hato’o agradese ba Asosiasaun Rede Covalima fó formasaun ba GSI”, dehan.
Jornalista: Celestina Teles
Editora: Maria Auxiliadora
