DILI, 06 juñu 2024 (TATOLI)–Prezidente Komisaun Funsaun Públika (KFP), Leotêncio Leite no Prezidente Konsellu Ezekutivu Institutu Nasionál Siéntifika Teknolojia (INCT, sigla portugés), José Cornélio Guterres, kinta ne’e, fó pose ba diretór foun tolu.
Emposadu tolu ne’e mak hanesan, Benvimdo Domingos José Guterres sai Diretór Nasionál Katalogasaun Siénsia, Repozitóriu Sientífiku Dijitál, Leonel da Costa Xavier sai Diretor Nasionál Siénsia Sosiál no Umana, no Valente Ferreira sai Diretór Nasionál Siénsia Ezata Kultura.
Biban ne’e, Prezidente KFP, Leotêncio Leite, husu ba diretór emposadu atu lori inisiativa foun sira ba instituisaun.
“Ba emposadu na’in-tolu ne’ebé ohin halo juramentu, iha juramentu ne’e revela liafuan lubuk ida-ne’ebé tenke halo tuir no ami-nia esperansa katak ba oin ita-boot na’in-tolu bele lori duni inisiativa foun, lori duni produtividade ida, no lori duni idea foun mai iha INCT,” Prezidente KFP hateten hafoin serimónia tomada pose iha salaun INCT, Balide.
Nia dehan, pozisaun ne’ebé sira asume ne’e importante no ezije iha momentu ida agora, pozisaun ida ba umanizmu no siénsia naturál, ne’ebé komponente rua ne’e importante tebes ba konstrusaun Estadu.
“Ida ko’alia kona-ba ita-nia influénsia globalizasaun, seluk ba ita-nia umanizmu iha sosiedade no oinsá mak ita moris iha sosiedade,” nia akresenta.
Notísia relevante : 2024, INCT instala repozitóriu dijitál no ISSN ho fundu rihun $150
Iha fatin hanesan, Prezidente Konsellu Ezekutivu INCT, José Cornelio Guterres, husu ba emposadu sira atu serbisu maka’as no lori progresu di’ak ba instituisaun no Estadu.
“Husu ba diretór sira tenke halo planu ho di’ak, lee maka’as, kompreende planu estratéjiku, kompreende ita-nia lei ne’e importante tebes. Ita atu promove peskiza nomós oinsá disamina rezultadu ne’e, husi ne’e ita prepara planu estratéjiku ba isu lima. Atu Implementa ida-ne’e ita kria diresaun haat hanesan Diresaun Siénsia Sosiál Umana, Teknolojia Inovasaun, Katalogasaun no Dijitál Repozitóriu, Siénsia Ezata no Naturál. Ami presiza duni diretór sira atu prenxe duni diretór sira ne’e, Diretór Inovasaun Teknolojia ne’e iha ona, ami presiza mak sira na’in-tolu,” nia tenik.
Nia esplika, kestaun lima ne’ebé importante ba instituisaun mak hanesan investigasaun, inventrizasaun, publikasaun, akreditasaun, no dezenvolvimentu institusionál.
“Mensajen isu lima ne’e mak sei sai hanesan doutrina ida ba diretór ida-idak, planu asaun anuál tenke reflete ba ita-nia planu estratéjiku nune’e ita bele responde ba vizaun no misaun ho di’ak, depois diretór sira tenke halo planu ho di’ak no kompreensivu, tanba planu sira ne’e ita sei aprezenta iha planu konsellu sientífiku,” Prezidente INCT, tenik.
Emposadu, Valente Ferreira, komprometidu sei kumpre devér no kolabora ho di’ak hodi serbisu hamutuk ho superiór sira inklui estrutura hotu iha INCT.
“Ita promete katak INCT iha ne’e maibé ita iha espetativa a’as no ita fiar katak bazeia ba ita-nia abilidade, koñesimentu no esperiénsia serbisu, ita sei dedika ita-nia serbí Institutu Nasionál Siénsia no Teknolojia tuir ninia estatutu no regulamentu internu sira, no halo tuir norma no regra sira, nune’e mós devér jerál no espesiál sira hanesan funsionáriu no ajente administrasaun publika sira, ne’ebé determina ona iha estatutu funsaun públiku. Ita sei kumpre devér sira, kolabora no serbisu hamutuk ho superiór sira no estrutura hotu husi INCT, inklui estabelese relasaun di’ak ho sira-ne’ebé serbisu hamutuk ho instituisaun Estadu no privadu sira seluk,” nia salienta.
Jornalista : Osória Marques
Editora : Julia Chatarina
